Памёр экс-дырэктар фестывалю "Славянскі базар" Радзівон Бас
Яму было 64 гады.
Ва ўзросце 64 гадоў памёр былы дырэктар фестывалю "Славянскі базар" Радзівон Бас, піша tut.by. Ён быў нязменным дырэктарам фэсту 21 год — ад яго з'яўлення.
Пра смерць Баса паведаміла ў сваім акаўнце ў Фэйсбуку Ганна Бонд.
Радзівон Бас — заслужаны дзеяч культуры Беларусі, ганаровы грамадзянін Віцебска, музыка.
У 1991 годзе ён ініцыяваў музычны фэст "Славянскі базар" у Віцебску, з 1992-га быў дырэктарам гэтага фэсту. Пад яго кіраўніцтвам "Славянскі базар" двойчы станавіўся "Лепшым фэстам года" (2000 г., 2004 г.) паводле ацэнкі Міжнароднай федэрацыі фестывальных арганізацый (FIDOF).
У 2013 годзе хвароба змусіла Баса пакінуць "Славянскі базар". У СМІ паведамлялася, што яму ампутавалі абедзве нагі.