Пададзена яшчэ адна заяўка на правядзенне "Чарнобыльскага шляху" ў Мінску
Аргкамітэт акцыі заявіў пра жаданне правесці 26 красавіка мітынгу ў сталічным парку Дружбы Народаў з 18 да 20 гадзін.
Заяўка ў Мінгарвыканкам пададзена суарганізатарам мерапрыемства прадстаўніком грамадскага аб'яднання "Экадом" Таццянай Новікавай. Мітынг будзе прысвечаны праблемам ядзерных катастроф і чарнобыльскай аварыі, інфармуе БелаПАН.
Нагадаем, 9 красавіка была пададзена заяўка на правядзенне акцыі ў наступным фармаце: збор удзельнікаў шляху ў 12.00 каля кінатэатра "Кастрычнік", шэсце па вуліцах Багдана Хмяльніцкага, Якуба Коласа, Лагойскім тракце да Курапат, дзе ў 15.00 павінен пачацца мітынг.
Рашэнне аб падачы другой заяўкі было прынята на пасяджэнні аргкамітэта па правядзенні акцыі 9 красавіка, ужо пасля таго, як у гарвыканкам была перададзена першая заяўка. Зроблена гэта, каб падстрахавацца на выпадак адмоўнага адказу па першай заяўцы.
Фота — bymedia.net