Паліцыя арыштавала двух падазраваных, якія, верагодна, планавалі напад. Ім 17 і 19 гадоў. Адзін з іх планаваў напасці на гледачоў канцэрту, "выкарыстоўваючы выбухоўку і нажы". Мяркуецца, што падазраваныя планавалі забіць сябе — і вялікую колькасць людзей.
"Я пачула гэтую навіну, калі была ў аэрапорце, і крыху паплакала ў прыбіральні", — сказала Джэсіка, якая ляцела ў Вену з Брытаніі.
Іншая прыхільніца Свіфт, Наташа, кажа, што больш за год рыхтавалася да канцэрту — майстрыла бранзалеты і прадумвала ўбранне.
"Людзі сядзяць у гатэльных нумарах і не ведаюць, што рабіць. Яны ў шоку. Вядома, многія плачуць", — кажа адна з прыхільніц спявачкі.
На мінулым тыдні тры дзяўчынкі загінулі, калі мужчына з нажом напаў на танцавальны клас, дзе дзеці развучвалі рухі ў стылі Тэйлар Свіфт. Пасля гэтага Брытанію захліснула хваля пратэстаў.
У інтэрв'ю 2019 года Тэйлар Свіфт казала, што атака на гледачоў яе канцэрту — "яе самы вялікі страх".
Аўтастопам па Галактыцы
Хтосьці вярнуўся, а хтосьці — захрас. У пачатку чэрвеня двое амерыканскіх астранаўтаў Бары "Бутч" Уілмар і Суніта Уільямс адправіліся ў выпрабавальны палёт на Міжнародную касмічную станцыю. Яны тэставалі новы касмічны карабель і мусілі вярнуцца праз некалькі дзён — але проста цяпер яны ўсё яшчэ на станцыі і затрымаліся там як мінімум да Калядаў.
Палёт пайшоў не па плане, у карабля адключыліся некалькі рухавікоў. І хоць астранаўты шчасліва дабраліся да касмічнай станцыі, вярнуцца ім пакуль няма на чым. Нядаўна на МКС падвезлі дадатковыя прадукты і адзенне.
Магчыма, карабель Starliner, які іх прывёз, яшчэ ўдасца запусціць. Але не выключана, што вяртацца давядзецца іншым транспартам. І гэта зойме час.
У верасні НАСА запусціць наступную місію — на караблі, разлічаным на чацвярых, пакінуць два пустых месцы для Бары і Суніты. Але ім трэба будзе пачакаць... паўгода. Гэта значыць заставацца на МКС, пакуль гэтая новая місія не завершыцца — і толькі пасля яны змогуць "падсесці".
Астранаўты не скардзяцца, у космасе ім падабаецца (праўда падчас мінулага аптымістычнага брыфінгу яны думалі, што захраслі на пару тыдняў, а не на паўгода).
Гэта проста нейкі сіквел фільма "Аўтастопам па Галактыцы".
