Пад Кобрынам цыркавы слон вырваўся на волю і пайшоў гуляць па вёсцы
Пад Кобрынам участковы міліцыянт і даішнікі дапамагалі вярнуць у загон цыркавога слана, які раптоўна вырваўся на волю. Незвычайны інцыдэнт адбыўся сёння каля першай гадзіны дня, паведамляе прэс-служба МУС.
У Кобрынскі РАУС паступіла тэлефанаванне ад жыхаркі вёскі Вялікія Ляпесы. Жанчына паведаміла, што ў вёсцы Ляскова па гравійнай дарозе ходзіць слон.
На месца прыбыў экіпаж ДАІ разам з участковым інспектарам. Сапраўды, па вёсцы гуляў слон і палохаў мясцовых жыхароў. Побач знаходзіўся прадстаўнік цырка “Дзіва”, якому і належыць жывёла. Ён патлумачыў, што непадалёк ёсць тэрыторыя, дзе ўтрымліваюць цыркавых жывёлаў у чаканні мытнага афармлення. Слон пасвіўся на вольным выгуле, аднак сёння раніцай ён зламаў агароджу і выйшаў з тэрыторыі пашы.
Праваахоўнікі дапамаглі вярнуць слана ў загон. Абышлося без здарэнняў і пацярпелых.
