Новая праверка не знайшла мату ў выказваннях брэсцкага даішніка
Скандальная справа з брэсцкім даішнікам, які аблаяў матам кіроўцу, атрымала працяг. Цяпер МУС заяўляе, што чарговая праверка не знайшла нецэнзурнай лексікі на відэазапісе канфлікту паміж кіроўцам і супрацоўнікам ДАІ, што адбыўся ў Брэсце 10 кастрычніка 2015 года.
Ведамства паведамляе, што падчас падрыхтоўкі адказу брэсцкаму кіроўцу на яго зварот была зробленая памылка. Маўляў, была некарэктна пададзеная вытрымка з лінгвістычнай экспертызы, якую рабіла дэкан філалагічнага факультэта БрДУ імя А.С. Пушкіна, Вольга Фелькіна. Паводле інфармацыі МУС, “пры праслухоўванні запісу канфлікту паміж Пацамаем А. і маёрам міліцыі Пятручыкам С. нецэнзурных выразаў не зафіксавана... Фраза “Ідзі на ...” не выяўленая”. Але гэтая акалічнасць у адказе, накіраваным Пацамаю, не была адлюстраваная, адзначаецца ў паведамленні МУС.
Эксперт тлумачыць чаму вырашыў, што “Ідзі на х*й” не з’яўляецца абразай
Прэс-служба дадае, што нягледзячы на правамернасць ужывання сілы і спецсродкаў супраць кіроўцы, супрацоўнікі ДАІ парушылі правілы прафесійнай этыкі, за што паняслі дысцыплінарную адказнасць.
Нагадаем, канфлікт адбыўся 10 кастрычніка 2015 года на стаянцы каля гандлёвага дома “Дзідас персія” ў Брэсце. Супрацоўнікі ДАІ спынілі кіроўцу і запатрабавалі выйсці з машыны, ад чаго ён адмовіўся. Пасля чаго кіроўцу выцягнулі сілай. Відэазапіс, які пры гэтым вёўся, нібыта сведчыць пра наяўнасць нецэнзурнай лексікі на адрас кіроўцы.
