Непаўналетняя цяжарная абкрадала лекараў падчас прыёму

У Столінскім раёне асудзілі за крадзяжы маладую маці, піша газета МУС "На страже". Яе ахвярамі станавіліся лекары.

Першы крадзеж яна ўчыніла гэтым летам. Непаўналетняя цяжарная прыйшла на прыём у амбулаторыю аграгарадка Рубель Столінскага раёна. Там яна скрала 100 рублёў з кашалька медсястры. 

Яшчэ тры крадзяжы яна ўчыніла пасля таго, як нарадзіла дзіця. У медустанове скрала яшчэ 100 рублёў, потым 80 рублёў — у адным з кабінетаў сельвыканкама, а яшчэ пазней — 130 рублёў падчас медагляду дзіцяці. Апошняя ахвяра звярнулася ў міліцыю, і зламысніцу затрымалі па гарачых слядах. 

На судзе выявілася, што адна з ахвяраў наведвала цяжарную дома, а другая рабіла прышчэпкі яе дзіцяці. 

Як піша газета "На страже", на судзе маладая маці манатонна прасіла прабачэння ў пацярпелых. Таксама яна добраахвотна кампенсавала прычыненую шкоду. 

Суд прызначыў ёй абмежаванне волі на адзін год без накіравання ў папраўчую ўстанову адкрытага тыпу.