Наталля Пяткевіч, якой забаронены ўезд у ЗША, зрабіла фота ў цэнтры Нью-Ёрка

Фатаздымкі былой першай намесніцы Адміністрацыі прэзідэнта Наталлі Пяткевіч у Нью-Ёрку'явіліся ў сацыяльных сетках. Між тым з 2006 года яна знаходзіцца пад санкцыямі ЗША. 

Фатаздымкі з Пяткевіч выклаў у сваім акаўнтце ў Твітары амерыканскі чыноўнік Раві Батра. Як адзначае nn.by, гэта дарадца па пытаннях правоў чалавека, які, мяркуючы па яго допісах, трымаецца жорсткай лініі ў дачыненні да Расіі. 

На яго фота можна пабачыць Наталлю Пяткевіч, яе мужа Валянціна Рыбакова — кіраўніка беларускага прадстаўніцтва пры ААН, сына Пяткевіч — Філіпа, а таксама амерыканскіх паліцыянтаў. 

Хаця Пяткевіч знаходзіцца пад санкцыямі ЗША, прылятаць да мужа яна мае права, бо Рыбакоў яе запрашае па лініі ААН, а не ў ЗША як дзяржаву. Праўда, карыстацца сваім рахункам ці іншымі выгодамі, якія патрабуюць ідэнтыфікаваць асобу, Пяткевіч у ЗША не можа. 

Ёсць верагоднасць, што гэтым разам Пяткевіч прыехала да мужа надоўга: Батра запосціў у твітары фатаздымкі з вечарыны ў гонар "далучэння Наталлі да мужа".