Нацыянальны гістарычны музей набыў карціны з дэмсіламі-сатаністамі і Лукашэнкам
![Непераўзыдзенае мастацтва](/sites/default/files/styles/gallery_main/public/2024-03/20.jpg.webp?itok=1IHI4nzR)
Непераўзыдзенае мастацтва / @rubanau_collage
Апошні тыдзень беларускі культурны асяродак абмяркоўваў чуткі, што Нацыянальны гістарычны музей набыў ва ўласны фонд карціны Святланы Жыгімонт, мастачкі і прадпрымальніцы з праўладнымі поглядамі. Малюнкі павінны былі стаць часткай новай музейнай экспазіцыі, прымеркаванай да 30-годдзя беларускай дзяржаўнасці.
У размове з журналістам Еўрарадыё Жыгімонт пацвердзіла, што музей сапраўды набыў частку яе творчасці. Гаворка ідзе пра трыпціх “Казка-быль пра Беларусь”. Пра арганізацыю выставы мастачка нічога не ведае.
Трыпціх складаецца з пастаральнай выявы Лукашэнкі, які размясціўся пад дубам, і дэманізаванага калектыўнага партрэта лідараў беларускіх дэмсілаў (Ціханоўскай, Вячоркі, Латушкі, Пракоп’ева і г.д.), якія сядзяць за сталом, на якім праводзіцца сатанінскі рытуал.
![Нацыянальны гістарычны музей набыў карціны з дэмсіламі-сатаністамі і Лукашэнкам](/sites/default/files/styles/default_image_paragraph/public/paragraphs/image/370993781_1746809235737504_6803477316491558920_n.jpg.webp?itok=Ru4tidop)
У Нацыянальным гістарычным музеі ў тэлефоннай размове Еўрарадыё распавялі, што падобная выстава ў раскладзе не фігуруе. Факт набыцця карцін аўтарства Жыгімонт там назвалі магчымым, паколькі фонды інстытуцыі перыядычна папаўняюцца новымі экспанатамі.
Цікава, што Святлана Жыгімонт восенню мінулага года скардзілася ў Фэйсбуку, што рэжым на яе забыўся: СМІ не публікуюць размовы з ёй, а дзяржава не купляе карціны і не дапамагае з выставамі.
Як відаць, скаргі мастачкі, нарэшце, усё ж былі пачутыя.
“Я не ведаю, ці сапраўды набылі малюнкі Святланы Жыгімонт, але ўпэўнены на 95%, што так і адбылося, — кажа мастацтвазнаўца, экскурсавод і блогер Мікіта Моніч. — Ёсць смешны момант, што некаторыя музейшчыкі лічаць, што гэтыя карціны было варта набыць Нацыянальнаму цэнтру сучасных мастацтваў. Бо дзяржава менавіта так сабе сучаснае мастацтва і ўяўляе. Але на мой пункт гледжання, варыянт з Гістарычным музеем таксама выдатны, бо галоўная функцыя музея якая? Захоўваць! А што гэта перад намі, як не дакумент эпохі, вельмі моцны, здаецца”.
Святлана Жыгімонт стала вядомай на хвалі рэпрэсій як аўтарка прапагандысцкіх карцін, якія адлюстроўваюць праўладны погляд на падзеі 2020 года і вайну ва Украіне.
Таксама мастачка актыўна піша ў сацсетках, дзе палівае брудам усіх, хто крытыкуе лукашэнкаўскі ці пуцінскі рэжым, агрэсію Расіі, ці крытыкуе яе творчасць.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.