На раскопках Старога замка ў Гродне знайшлі добра захаваны сярэднявечны дом
У Гродне працягваюцца археалагічныя раскопкі на тэрыторыі Старога замка. Падчас іх навукоўцы знайшлі вялікі драўляны дом сярэдзіны XIV стагоддзя, піша tut.by.
Па іх словах, добра захаваліся падмурак, зруб і печка будынка. Па захаваных частках можна пабачыць, як жылі гродзенцы ў сярэднявеччы.
Спецыялісты кажуць, што дом даволі вялікі для сваёй эпохі — зруб памерам 9 на 4 метры. Пакуль што археолагі расчысцілі толькі частку пабудовы. Унутры яны знайшлі розныя прадметы побыту.
Нагадаем, што апошнім часам раскопкі ў Гродне прынеслі некалькі ўнікальных знаходак, у тым ліку сярэднявечную шахматную фігуру і частку шахматнай дошкі.
