На Маршы народаўладдзя затрымалі кубінца — яму пагражае дэпартацыя
![Рабэрта Касануэва / "Фэйсбук"](/sites/default/files/styles/main_image_watermark_/public/2023-08/89775080_10215077992093694_8670643989633826816_o.jpg.webp?itok=8bOHnyof)
Рабэрта Касануэва / "Фэйсбук"
На Маршы народаўладдзя ў Мінску затрымалі 55-гадовага кубінца Рабэрта Вальдэса Касануэву. Раніцай 11 лістапада ён усё яшчэ чакае суда ў мінскім ІЧУ на завулку Акрэсціна. А пасля суда міліцыя можа падняць пытанне аб яго дэпартацыі.
— У Рабэрта скончыўся від на жыхарства. Яго павінны дэпартаваць з Беларусі, — распавядае Еўрарадыё Ірына, калега Рабэрта.
Амаль 30 гадоў Касануэва пражыў у нашай краіне. Ён працуе тут графічным дызайнерам, свабодна гаворыць па-руску і актыўна выказвае сваю грамадзянскую пазіцыю: выступае супраць фальсіфікацый на беларускіх выбарах і гвалту з боку сілавікоў. Са слоў калегаў, Рабэрта выходзіў на пратэстныя маршы кожную нядзелю. 8 лістапада аказалася фатальным.
— Сябры, мяне дэпартуюць з краіны. Улады адмовіліся падаўжаць мой від на жыхарства праз маю палітычную пазіцыю, — пісаў Касануэва ў сярэдзіне верасня. — Я аддаў гэтай краіне амаль 30 гадоў, шмат працаваў. У мяне тут застаюцца трое дзяцей: Клаўдыя, Крысціян і Альберта (непаўнагадовы).
Я зрабіў тут усё, што мог, вельмі спадзяюся і мару ў хуткім часе ўбачыць Беларусь з чыстым небам над галавой без Лукашэнкі. Ні пра што не шкадую адносна маёй пазіцыі, і калі спатрэбілася б рабіць гэта яшчэ раз, то рабіў бы яшчэ больш.
Паводле інфармацыі праваабарончага цэнтра "Вясна", суд над Раберта адбыўся 10 лістапада па Skype у судзе Партызанскага раёна. Яго пакаралі 15 суткамі адміністрацыйнага арышту. Касануэва віну не прызнаў.
![На Марше народовластия задержали кубинца — ему грозит депортация](/sites/default/files/styles/default_image_paragraph_watermark/public/paragraphs/image/snimokekrana2020-11-11v131423.png.webp?itok=R1FzlSXz)
Раніцай 11 лістапада сябры Рабэрта прыехалі да ІЧУ на Акрэсціна, каб даведацца, калі адбудзецца суд і колькі яшчэ яго плануюць тут трымаць. Пакуль што ім не паведамілі ніякай падрабязнай інфармацыі.
Згодна з беларускім заканадаўствам, чалавек, у дачыненні да якога ўжытая дэпартацыя або высылка, можа быць затрыманы на тэрмін, неабходны для выканання пастановы аб дэпартацыі або высылкі. Былі выпадкі, калі замежнікі ў чаканні выправаджэння з Беларусі праводзілі ў ІЧУ па паўгода — без сувязі з роднымі, без перадач, а значыць, без неабходнага адзення і сродкаў гігіены.
Змяшчэнне замежных грамадзян і асоб без грамадзянства ў ІЧУ праваабаронцы расцэньваюць як жорсткае абыходжанне, якое прыніжае чалавечую годнасць. Бо ізалятары непрыдатныя для ўтрымання людзей працяглы тэрмін.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.