На Данбасе пачаў дзейнічаць рэжым спынення агню
Украінскія войскі і баевікі заяўляюць пра спарадычнае парушэнне гэтага рэжыму іншым бокам.
Ад 00 гадзін 15 лютага на Данбасе пачаў дзейнічаць рэжым спынення агню. Адпаведны загад прэзідэнт Украіны Пётр Парашэнка даў Узброеным сілам Украіны, Нацыянальнай гвардыі і іншым падраздзяленням. Пра гэта ён заявіў падчас трансляцыі з Генеральнага штаба ў жывым тэлеэфіры.
"Я аддаю зараз загад Узброеным сілам Украіны, Нацыянальнай гвардыі, падраздзяленням Міністэрства ўнутраных спраў, падраздзяленням Памежнай службы, падраздзяленням Службы бяспекі — спыніць агонь у 00.00 15 лютага", — перадае УНІАН словы Парашэнкі.
Нагадаем, што гэтае рашэнне было прынятае на перамовах "нармандскай чацвёркі" ў Мінску 12 лютага.
Тым часам і ўкраінскія войскі, і баевікі заяўляюць, што іншы бок спарадычна парушае рэжым спынення агню.
Фота — Twitter Парашэнкі
