Мітрапаліт Павел павіншаваў праваслаўных беларусаў з Нараджэннем Хрыстовым
![Мітрапаліт Павел павіншаваў праваслаўных беларусаў з Нараджэннем Хрыстовым](/sites/default/files/styles/gallery_main/public/2023-08/paviel-0601.jpg.webp?itok=Ij7yJmsU)
Мітрапаліт Мінскі і Заслаўскі Павел, Патрыяршы Экзарх усея Беларусі на пярэдадні свята Божага нараджэння звярнуўся да праваслаўных вернікаў з пасланнем.
У сваім звароце ён нагадвае, што хрысціяне павінны рабіць дабро штодня, а не прынагодна, ад выпадку да выпадку.
"Гасподзь заклікае ўсіх нас рабіць дабро па меры нашых магчымасцяў і памятаць, што ёсць такія добрыя справы, да якіх закліканы ўсе хрысціяне. Гэта шчырае прабачэнне прычыненых нам крыўд і малітва за нашых бліжніх, сардэчнае спачуванне да людзей, якія жывуць у нястачы, і малітоўнае ўздыханне да Бога аб тых, каму мы не можам дапамагчы фізічна", — нагадвае мітрапаліт.
Ён заклікае вернікаў прынесці Хрысту свае дары, як гэта зрабілі валхвы пры нараджэнні Богадзіцяці.
"Хрыстос нараджаецца — услаўляйце! Хрыстос з нябёсаў — сустракайце! Хрыстос на зямлі — узносьцеся!" — абвяшчае ў гэтыя светлыя дні Святая Царква. Сустрэнем жа Госпада належнымі дарамі і прынясем Яму замест золата, ладану і смірны моцную веру, натхнёную надзею, дзейную любоў", — прапануе мітрапаліт вернікам.
На Нараджэнне Хрыстова мітрапаліт Павел будзе праводзіць службы ў Свята-Духавым кафедральным саборы ў Мінску.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.