Міністр не дапамог: на Ашмяншчыне разбіраюць стагадовыя драўляныя будынкі
![Драўляны будынак, які зносяць пад Ашмянамі / Еўрарадыё](/sites/default/files/styles/gallery_main/public/2023-08/photo_2021-03-10_10-38-14.jpg.webp?itok=1HfADlWF)
Драўляны будынак, які зносяць пад Ашмянамі / Еўрарадыё
Улады Ашмянскага раёна пачалі знос двух драўляных будынкаў у вёсцы Родзевічы. Дырэктар фонду "Краіна замкаў" Алесь Варыкіш знайшоў іх у суседніх вёсках і хацеў выратаваць ад разбурэння, перавёзшы ў свой будучы музей пад адкрытым небам. Але, здаецца, не атрымалася.
— На сённяшні дзень ужо ёсць рашэнне сельвыканкама аб зносе двух аб'ектаў, і адзін з іх ужо разбіраюць. Другім будуць разбіраць свіран пачатку XX стагоддзя, — расказвае Еўрарадыё Алесь.
![Министр не помог: на Ошмянщине разбирают столетние деревянные здания](/sites/default/files/paragraphs/image/4564.png)
Гэтыя будынкі Варыкіш выкупіў, акуратна разабраў і зноўку сабраў на шляхецкім хутары Ракіцкіх у Родзевічах. Там яны стаялі каля шасці гадоў, але ў 2021 годзе мясцовыя ўлады вырашылі іх знесці. У пошуках справядлівасці краязнаўца дайшоў да міністра культуры Анатоля Маркевіча, і той нібыта ўвайшоў у становішча, але... у сакавіку на даху драўляных будынкаў ужо сядзяць мясцовыя камунальнікі.
Разбіраць карпатліва сабраныя ім самім будынкі ў Алеся не паднялася рука. У выніку гэта робяць работнікі камунальных службаў. За гэта Алесю могуць выставіць рахунак — ад 10 да 20 тысяч рублёў.
— Рахунак яшчэ не выставілі. Я так разумею, што, калі будзе выкананы пэўны аб'ём работ, тады мне і рахунак выставяць, — расказвае дырэктар "Краіны замкаў".
![Министр не помог: на Ошмянщине разбирают столетние деревянные здания](/sites/default/files/paragraphs/image/photo2021-03-1010-38-09.jpg)
А што з міністрам Маркевічам? Так і не дапамог захаваць міні-скансэн?
— Было накіравана абскарджанне рашэння Ашмянскага РВК у вобласць, заяўлена хадайніцтва на прыпыненне дзеяння распараджэння аб зносе аб'ектаў да прыняцця рашэння Гродзенскім аблвыканкамам. Але, відаць, старшыні Ашмянскага РВК Уладзіславу Гершгорыну пляваць і на меркаванне міністра, і на пазіцыю вобласці, шашку нагала — і ў бой. Дый ад міністра нічога не чуваць — відаць, нейкая маральная пазіцыя ў яго прысутнічала, але гэта ні на што не паўплывала.
![Министр не помог: на Ошмянщине разбирают столетние деревянные здания](/sites/default/files/paragraphs/image/skleykaza.jpg)
Алесь Варыкіш не разумее, чаму ўлады вырашылі знесці будынкі. Паводле яго слоў, артыкул 223 Грамадзянскага кодэкса прадугледжвае і іншыя формы вырашэння праблемы, такія як узаконьванне і штраф.
— Што самае дзікае ў гэтай сітуацыі — на сённяшні дзень у старадаўняга свірна няма падмурка, зруб стаіць на драўляных цурках, фактычна на зямлі. Гэта значыць, згодна з азначэннем артыкула 130 Грамадзянскага кодэкса Рэспублікі Беларусь, гэта не аб'ект нерухомасці, не капітальны будынак, — мяркуе Алесь. — А ў рашэнні сельвыканкама гаворка ідзе якраз пра знос капітальных будынкаў. Але пры такой рашучасці мясцовай улады я ўжо нічому не здзіўлюся. Вельмі хочацца спадзявацца, што грамадскі розгалас дапаможа спыніць гэта дзікунства.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.