Міліцыя прапануе правяраць старшакласнікаў на ўжыванне наркотыкаў
Міліцыя Мінскай вобласці прапанавала правяраць вучняў старэйшых класаў на ўжыванне наркотыкаў падчас агульнага медагляду.
"Зараз рыхтуецца шэраг дакументаў для абмеркавання на сесіі дэпутатаў аблвыканкама. Праводзяцца даследаванні, вывучаецца вопыт у прыватнасці ЗША. Абмяркоўваюцца шляхі правільнага рашэння гэтага пытання", – распавялі Еўрарадыё ў міліцыі.
Наступнае абмеркаванне гэтага пытання пройдзе праз два месяцы. Каб з'явілася магчымасць правяраць школьнікаў на наркотыкі, патрэбныя змены ў заканадаўстве. Таму пытанне мусіць прайсці праз абмеркаванне дэпутатаў, міністэрстваў адукацыі і аховы здароўя.
Магчыма, праз некалькі месяцаў будуць праводзіцца эксперыменты на базе школ, але гэта ініцыятыва павінна сыходзіць ад бацькоў, дадалі ў міліцыі.
Таму цяпер праваахоўнікі будуць тлумачыць бацькам, што гэта добрыя прэвентыўныя меры і праз іх не будзе ніякіх наступстваў для дзяцей.
Дарэчы, даследаванні, якія праводзіліся ў мінулым годзе, паказалі, што каля 30 працэнтаў школьнікаў хоць раз ужывалі наркотыкі.
