Мэрыя пабудавала дамы для катоў, а кракадзілы выратавалі шчанюка — #ІхНоравы

30/09/2023 - 08:49

"Іх норавы" / @rubanau_collage

У Індыі кракадзілы дапамаглі шчанюку ўратавацца ад зграі сабак. Так-так, вось пра такія навіны мы і плануем расказваць вам у выхадныя.

Мы вырашылі, што ў выхадны дзень вы маеце права на порцыю неблагіх навін. І сабралі для вас самую нястрашную падборку тыдня.

Дамкі для свабодных катоў

У Любліне ўсталююць 12 новых дамкоў для бяздомных катоў. Гэтым займаецца... гарадская мэрыя. Кожны дом разлічаны на 6 катоў. Яны ўцепленыя пенапластам і абараняюць ад холаду, ветру і дажджу.

Аказваецца, у мэрыю звярнуліся таварыствы ўласнікаў і папрасілі забяспечыць катоў, якія пасяліліся на раёне, дамкамі. І мэрыя сваю справу зрабіла. А яшчэ заклікала жыхароў тых дамоў, якія не папрасілі дамкоў, не зачыняць на зіму вокны падвала, каб каты маглі схавацца там ад холаду.

У Дэпартаменце азелянення і муніцыпальнага кіравання Любліна кажуць, што ў іх у горадзе хапае людзей, якія дапамагаюць вольным катам і коткам перажыць цяжкія зімы.

“І ўсё адно кожную восень мы таксама закупляем драўляныя дамкі, якія дастаўляюцца зацікаўленым жылым комплексам. Важна, рашэнне пра месца размяшчэння такіх дамкоў было добра прадуманае і ўзгодненае з жыхарамі”, — кажуць у Дэпартаменце.

І, дарэчы, катоў і котак у Любліне бяздомнымі не называюць — яны тыя, што "вольна жывуць".

Хто ляжаў на маім ручніку?

У Грэцыі набірае абароты бунт пляжных ручнікоў. Гэта акцыя пратэсту супраць пляжных бараў і іншых устаноў, якія акупавалі берагавую лінію і прапануюць шэзлонгі па нечуваных цэнах. А згодна з грэцкай Канстытуцыяй, пляжы і наогул уся прырода Грэцыі належыць жыхарам краіны.

Пляжныя бізнесы, якія ставяць шэзлонгі і парасоны, мусяць падаць заяўку на атрыманне ліцэнзіі ад міністра фінансаў Грэцыі. А потым да іх рэгулярна мусяць прыходзіць з праверкамі, каб пераканацца, што яны не занялі больш месца, чым дазваляе ліцэнзія.

Пратэстоўцы кажуць, што праверкі праходзяць рэдка, і бары ставяць столькі сваіх шэзлонгаў, што мясцовым няма куды паслаць пляжны ручнік.

Цяпер мясцовыя жыхары падымаюць над пляжамі дроны, каб паказаць, як разрасліся бізнесы — і як мала месца пад пляжным сонцам засталося для саміх грэкаў.

Мэрия построила дома для кошек, а крокодилы спасли щенка — #ИхНравы

Пляжны ручнік / pixabay

З аднаго боку, яны проста спрабуюць вярнуць сабе бясплатны ўваход на пляж, а пляж і мора — частка грэцкай культуры. З іншага — удзельнікі пратэстаў звяртаюць увагу на пабочныя праблемы, якія выклікае празмерны турызм. І сацыяльныя, і экалагічныя. І просяць урад пачаць іх вырашаць.

Хто ляжаў у маёй лазенцы?

У адной полькі былі падазрэнні, што хтосьці наведваецца да яе ў дом, калі яна ідзе на працу або з'язджае з горада. Усё аказалася нашмат цікавейшым.

Дваццацігадовы злодзей знайшоў запасны ключ, які жыхары дома пакідалі недалёка ад дзвярэй, і некалькі дзён карыстаўся ім, каб трапіць унутр. А калі ключ перахавалі, пачаў хадзіць у госці праз акно.

Грошай рабаўнік узяў зусім няшмат — усяго каля сарака еўра. І яшчэ ежы прыкладна на 25 еўра. Галоўнай жа мэтай была... лазенка. Мужчына падчас сваіх візітаў праў і прымаў ванну.

У дзень, калі паліцыянты ўсё ж затрымалі яго, ён вярнуўся на месца злачынства, каб забраць вымытую бялізну. Фінал гісторыі невясёлы: маладому чалавеку пагражае да 10 гадоў пазбаўлення волі.

Мінулы сезон

Даследчыкі знайшлі самы стары абутак у Еўропе — вытканыя з травы сандалі. Ім каля 6 тысяч гадоў. Старажытныя еўрапейцы выкарыстоўвалі для гэтай мадэлі розныя віды траваў, скуру і вапну.

Сандалі знайшлі ў іспанскай пячоры, якую называюць пячорай кажаноў. Нізкая вільготнасць і вецер аказаліся спрыяльнымі ўмовамі, і таму абутак добра захаваўся. Як вы думаеце, гэта вінтаж?

Калі ты вельмі міленькі

Дык вось, у Індыі кракадзілы дапамаглі шчанюку выратавацца ад зграі сабак, якая за ім гналася. Дзівосны прыклад міжвідавай эмпатыі.

Шчанюк зваліўся ў небяспечную раку, калі ратаваўся ад зграі, якая гналася за ім. Тут ён мог бы і загінуць. Раней гэтыя ж кракадзілы ў гэтай жа рацэ нападалі на сабак. Але гэтым разам яны падштурхнулі шчанюка насамі да берага і дапамаглі выратавацца. Калі ты міленькі, шанцы на выжыванне павышаюцца.