Медыкі чакаюць бум ВРВІ

Пра гэта Еўрарадыё распавяла загадчыца эпідэміялагічнага аддзела Мінскага гарадскога цэнтра гігіены і эпідэміялогіі Алена Фісенка:

"Тэндэнцыя такая намецілася, але пакуль казаць пра нейкі пад'ём яшчэ рана. Мы чакаем, што тыдні праз два пачнуцца захворванні. Тут нават не столькі холад правакуе, хаця і ён таксама, — а вось тое, што дзеці пайшлі ў школы, дзіцячыя садкі, яны канцэнтруюцца, камунікуюць адзін з адным… А пасля лета кожны прыехаў са сваімі вірусамі і мікробамі, пачынаецца інтэнсіўны абмен мікрафлорай. І гэта заўсёды суправаджаецца пачаткам сезоннага ўздыму захворванняў ВРВІ".

Ужо цяпер людзі пачынаюць хварэць, але пакуль гэта звычайная прастуда, якая, як правіла, праходзіць у больш лёгкай форме, нават без тэмпературы, працягвае Алена Фісенка:

"Так, пачынаецца, але гэта яшчэ нават не ВРВІ, гэта так званыя рэспіраторныя інфекцыі. Як правіла, яны нават без тэмпературы праходзяць, як звычайная прастуда.

Класічныя грыпападобныя захворванні, рэспіраторныя — гэта трошку пазней ідзе. Пакуль у нас няма нейкіх адхіленняў у сувязі з рэзкім пахаладаннем. Гэтага мы не прасочваем. Хутчэй за ўсё, сезонны пад'ём захворванняў будзе праз 2-3 тыдні".

Тое, што наплыў пацыентаў пакуль не вельмі заўважны, пацвердзілі Еўрарадыё і ў мінскіх паліклініках.

Паліклініка №23: "Няма такога, нічога такога незаўважна. Росту ВРВІ няма".

Паліклініка №5: "Мы гэтага не адчулі. Пакуль народ заняты пачаткам навучальнага года. Усе вы гэта адчулі па корках на дарогах сёння і ўчора. Таму ў нас пакуль пацыентаў больш не стала. Гэта яшчэ не такое моцнае пахаладанне".

Тым часам пры жаданні прышчэпкі ад грыпу ў Мінску можна рабіць ужо зараз.

Алена Фісенка: "Прышчэпкі ў Мінску ўжо можна зрабіць, прывезлі вакцыну для камерцыйнага выкарыстання, вакцыну для групаў рызыкі мы чакаем на працягу бліжэйшага тыдня-двух. А ў прынцыпе, у нас ужо пачынаецца кампанія імунізацыі за кошт сродкаў арганізацый і прадпрыемстваў.

У паліклінікі ўжо пайшла інфармацыя пра тое, што ёсць вакцына і што яны ўжо могуць пачынаць аказваць паслугі насельніцтву па вакцынацыі".

Загадчыца эпідэміялагічнага аддзела Мінскага гарадскога цэнтра гігіены і эпідэміялогіі Алена Фісенка дала парады слухачам Еўрарадыё, як засцерагчы сябе ад прастуды:

"Самае галоўнае — гэта апранацца па надвор'і, таму што пераахалоджванне арганізма — стрэс для імунітэту. Справакаваць зніжэнне імунітэту можа і халадавы стрэс, і мокрыя ногі, і калі пад дажджом прамокніце".

Фота: photo.bymedia.net