Вы тут

У Магілёўскім раёне невядомыя выкралі інспектара ДАІ, яго забілі

twitter.com/SledcomRB

16 траўня ў Магілёўскай вобласці невядомыя выкралі афіцэра дарожна-патрульнай службы ДАІ. Увесь асабісты склад абласнога УУС быў падняты па трывозе. На трасах з'явіліся міліцыянеры з аўтаматамі. Пра гэта паведамляе Telegram-канал NEXTA. Даішніка вывезлі на чорнай "Волзе" з рэгістрацыйнымі нумарамі Расійскай Федэрацыі. У салоне знаходзіліся яшчэ тры чалавекі. NEXTA распаўсюдзіў радыёперахоп арыентыроўкі міліцыі наконт зніклага супрацоўніка ДАІ. Пазней 23-гадовага лейтэнанта П. знайшлі ў Магілёўскім раёне, ён загінуў. Забойцаў шукаюць.

МУС паведамляе ў Twitter: "Сёння, 16 траўня, пры выкананні службовага абавязку загінуў супрацоўнік батальёна ДПС ДАІ УУС Магілёўскага аблвыканкама 1996 г. н. У цяперашні час у Магілёўскім раёне, паблізу трасы Магілёў — Шклоў, працуе следча-аператыўная група. Устанаўліваюцца абставіны здарэння". Гэты тэкст быў агучаны ў канцы выпуска навінаў на тэлеканале "Беларусь 1".

NEXTA інфармуе са спасылкай на свае крыніцы, што расследаванне забойства асабіста кантралюе Аляксандр Лукашэнка. Крымінальную справу распачалі па артыкуле "Забойства супрацоўніка органаў унутраных спраў у сувязі з выкананнем ім абавязкаў па ахове грамадскага парадку". Справа ў вытворчасці Цэнтральнага апарату Следчага камітэта. Забойцам пагражае смяротнае пакаранне.

Месца здарэння / TUT.by
Крыніца — Telegram-канал NEXTA
@nexta_tv