У сераду было шмат жадаючых патрапіць на суд. Каля будынка затрымалі Уладзіміра Шылу са словамі: "Вы спрабуеце незаконна прарвацца ў будынак суда".
Суд пачаўся ў аўторак. Пацярпелы супрацоўнік Салігорскага РАУС Ягор Царыковіч заявіў, што Акостка паваліў яго на зямлю. Былы дэсантнік сцвярджае, што не аказваў супрацілення пры затрыманні. Міліцыянер хоча атрымаць за маральную шкоду 2000 рублёў кампенсацыі.
Маці Руслана Акосткі Вольга расказала lider-press.by, што з часу затрымання ёй ні разу не дазволілі сустрэцца з сынам. Яна хацела спытаць у яго код банкаўскай карткі ў спадзяванні, што там ёсць грошы. "Я не шмат зарабляю, і лішняй капейкі ў сям'і няма, — кажа жанчына. — Але нават спытаць у сына код мне не далі".
Паводле яе слоў, Руслан быў звольнены з працы ў верасні 2020-га за ахоўную маску бел-чырвона-белага колеру.
Вольга Акостка пагаварыла з "пацярпелым" міліцыянерам. "Як вы змаглі падзенне пры мітусні давесці да такога судовага паседжання?", — спытала яна. Царыковіч спаслаўся на тое, што ў яго моцна баліць галава і спіна пасля падзення.
"Я дарую вам за ваш здзек над маім сынам, — гаварыла жанчына. — За тое, што вы ўжылі да яго гвалт, штурхалі палку сцяга ў рот са словамі: "Жры, чаго табе не хапае?". За ўсе тыя знявагі, якія Руслану давялося прайсці".
Вольга Акостка лічыць, што яе сын моцны і справіцца з выпрабаваннямі лёсу.
