Лявон Вольскі заспявае на французскай і харвацкай мовах

На прэзентацыі праекта, якая праходзіла яшчэ ў сакавіку, шмат якія песні былі выкананыя дуэтам. Напрыклад, з Уладзімірам Пугачам ці Ганнай Вольскай. Гэтым разам музыка рыхтуе новыя дуэты. Праўда, пакуль невядома, ці здолеюць сабрацца ўсе былыя ўдзельнікі.

Лявон Вольскі: "Пакуль што анансаваць рана, бо там той не можа, той будзе замяняцца, але дуэты будуць безумоўна. Будуць Аня Хітрык і Саша Памідораў дакладна, мы з імі падпісалі негалоснае пагадненне. Плюс яшчэ дадаюцца дзве песні ў паэтычную праграму на вершы Анатоля Сыса і на вершы Уладзіміра Караткевіча. Караткевіча называецца "Амаль хрысціянскі тост за ворагаў", а Сыса - "Хто натхніць мяне на смерць".

На прэзентацыі праекта падчас выканання песень ладзілася відэаінсталяцыя, на якой з невялічкай бабінкі вырастаў партрэт паэтаў-аўтараў выконваемай кампазіцыі. Прычым, гэтыя партэты намаляваў сам Лявон Вольскі. А гэтым разам, улічваючы больш шырокія тэхнічныя магчымасці, плануецца і больш багатая відэаінсталяцыя.

Лявон Вольскі: "Я спадзяюся, яна будзе значна багацейшая, чым тым разам. Будзе лепшая апаратура, відэа будзе больш разнастайнае. Будуць не толькі малюнкі, там будзе шмат фотаздымкаў. Зараз якраз над гэтым працуюць кліпмэйкер Мацвей Сабураў і наш дызайнер Ігар Назаранка. Яны зараз падбіраюць фота і відэаматэрыялы, таксама нейкая частка будзе брацца з архіваў. Карацей, больш грунтоўна будзем падыходзіць гэтым разам".

Каб скончыць канцэрт не на мінорнай ноце, падчас другога аддзялення плануецца выступ гурта "Крамбамбуля". Прычым, па словах Лявона Вольскага, будзе анансавацца новая праграма, у якой гучаць традыцыйныя песні розных еўрапейскіх народаў.

Лявон Вольскі: "Гэта, безумоўна, будзе гучаць сучасна, не тое што цымбалы ды гармонік. Некалькі песень я выканаю на мовах арыгіналаў, напэўна, гэта будзе французская ды харвацкая. Але новы альбом яшчэ толькі на сярэдзіне работы, можна сказаць. Тым не менш, у цяперашняй сітуацыі не варта песні заціскаць аж да выхаду альбома, з гэтым матэрыялам мы будзем знаёміць на ўсіх канцэртах. То бок ужо гатовыя ў нас тры беларускія традыцыйныя песні і чатыры іншаземныя".

Дарэчы, выхад новага альбом "Крамбамбулі" плануецца пад "Дзень святога Валянціна". Лявон плануе 14 лютага паўтарыць канцэрт амаль трохгадовай даўніны, калі прысутнічаў і сам Валянцін, які на месцы рэгістраваў шлюб закаханых пар. Але пакуль іншыя падрабязнасці гэтага мерапрыемства не вядомыя.

Што ж тычыцца "Белай яблыні грому", то выступ пачнецца а 19-й гадзіне, квіткі на канцэрт каштуюць ад 30 да 80 тысяч рублёў.

Фота: Tarantino