Лукашэнка з Пуціным — як беларусы з Лукашэнкам: гаранта суверэнітэту больш няма

14/04/2022 - 16:11

Лукашэнка памыліўся, паставіўшы на перамогу Пуціна / Reuters

Лукашэнка памыліўся, паставіўшы на перамогу Пуціна / Reuters

Беларусі не варта чакаць ваеннай агрэсіі з боку Украіны, як і правакацый расіян у Беларусі. Украіне і так ёсць чым заняцца, а расіянам не патрэбныя правакацыі, каб выкарыстоўваць Беларусь, як ім выгадна, мяркуе ваенны эксперт Ягор Лебядок.

Ці ёсць для Беларусі ваенная пагроза з боку суседзяў і чаму Лукашэнка больш не цікавы Захаду як перамоўшчык, Ягор Лебядок расказаў у стрыме Еўрарадыё.

— Украіне важней паражаць пункты кіравання і тыя аб'екты ваенныя, якія сапраўды пагражаюць. Гэта ўжо ўсходні фронт. Калі на Украіну ішла авіяцыя з нашага боку, тады так, мела сэнс біць. Не бачу ў гэтым сэнсу, пакуль пад Кіеў не вернецца фронт, скажам так. Гэта толькі сабе горш.

Яны [афіцыйны Кіеў. — Еўрарадыё] і так спрабуюць да Лукашэнкі паддобрывацца, каб ён не ўвёў войскі. Потым трэнд пайшоў, што давайце мы яго будзем дыстанцыяваць ад Расіі. Поспехаў, як кажуць.

Правакацыйных удараў з боку Расіі па Беларусі таксама не будзе, лічыць суразмоўнік. Бо Пуцін і так можа атрымаць ад Лукашэнкі ўсё, што яму трэба.

Пры гэтым улады Беларусі спрабуюць зрабіць выгляд, быццам гэта не так. На справе выйшла, што Лукашэнка памыліўся са стаўкай на Пуціна і перастаў быць гарантам незалежнасці і чалавекам, з якім Захад будзе весці дыялог, мяркуе суразмоўнік.

— У аўтарытарызме заўсёды каціруюцца не разумныя, а моцныя. Лукашэнка, мабыць, чакаў, што на хвалі перамогі Пуціна ён будзе такім самым пераможцам. А пераможца, па-першае, заўсёды моцны, а па-другое, усё, што было дрэннае да гэтага, спісваецца "вялікай перамогай".

Атрымалася ўсё з дакладнасцю да наадварот. Калі б ён гэта перачакаў, глядзіш, гадок-другі — і было б усё добра. Калі б цяпер пачалася вайна без задзейнічання беларускай тэрыторыі, тут Лукашэнка быў бы ў фаворы.

Цяпер Еўропе проста няма чаго весці дыялог з Лукашэнкам, бо ўсе важныя рашэнні залежаць ад Пуціна. Таму спробы ўклініцца ў перамовы паміж Украінай і Расіяй не прыносяць вынікаў.

— Гаварыць пра суверэнітэт вы можаце толькі на паперы. Гэта наступствы таго, што Лукашэнка хацеў стаць мегакрутым, а крутасць упала. Цяпер ён спрабуе з гэтай сітуацыі вылезці. І ў гэтым ключы гаварыць пра тое, што расіяне паспрабуюць тут нейкія правакацыі зрабіць, не бачу сэнсу. Нават калі Лукашэнка не пойдзе [вайной на Украіну. — Еўрарадыё], тэрыторыя ўсё роўна будзе выкарыстоўвацца расіянамі, як ім спатрэбіцца.

Не бачу, хто і як можа супрацьстаяць гэтаму. Беларускія войскі, якія два ці тры месяцы напампоўваюцца інфармацыяй пра брацкія дзяржавы, будуць біць расіян? Смешна. Фактычна цяпер Лукашэнка з Пуціным — гэта як беларускі народ з Лукашэнкам. Не ўхваляе, але процідзейнічаць не можа, — кажа на заканчэнне Ягор Лебядок.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.