Лукашэнка: я больш падобны на цяжкаатлета, чым на хакеіста
Кіраўнік дзяржавы патлумачыў спартсменам, чаму цяжкая атлетыка гэта не яго від спорту.
23 красавіка Аляксандр Лукашэнка сустрэўся са зборнай Беларусі па цяжкай атлетыцы, якая паспяхова выступіла на чэмпіянаце Еўропы ў Грузіі. Кіраўнік дзяржавы распавёў спартсменам, як ён адносіцца да іх віду спорту. Паводле слоў Лукашэнкі, з-за недахопу часу ён рэдка цалкам глядзіць спаборніцтвы па цяжкай атлетыцы.
"Шчыра кажучы, гэта не мой від спорту, хоць я больш на цяжкаатлета падобны, чым на хакеіста, — цытуе словы Аляксандра Лукашэнкі сайт sb.by. — Але гэта для мяне заўсёды была самая агідная дысцыпліна, калі я пачынаў прафесійна займацца спортам, калі трэба было шмат "качацца".
Аднак ужо на самым пачатку трэнер адразу сказаў Лукашэнку: "Так, вы малады чалавек, ад штангі далей. Вам вагу цягаць нельга, вам хапае таго, што ад прыроды закладзена". Я перахрысціўся".
Беларускі кіраўнік таксама назваў цяжкую атлетыку "самым цяжкім" і "нудным" відам спорту. Раней Аляксандр Лукашэнка гаварыў, што ён "чалавек "усяедны", для яго "вельмі важны любы від спорту, пачынаючы ад хакея і фігурнага катання і заканчваючы шахматамі". "Я ж ніякі хакеіст, я хакеіст па няшчасці", — прызнаўся ён некалькі гадоў таму журналістам.
Як інфармуе сайт nn.by, алімпійскі чэмпіён Андрэй Арамнаў адсутнічаў на сустрэчы з Аляксандрам Лукашэнкам, паколькі адпачывае ў Егіпце.