Лукашэнка распавёў, чаму кватэру Зельцэра штурмавалі без бронекамізэлек

Аляксандр Лукашэнка выказаўся накот таго, чаму пры штурме кватэры Андрэя Зельцэра сілавікі былі без бронекамізэлек.

"Чаму хлопцы былі без абароны? Іх можна за гэта асуджаць. Гэта была іх ініцыятыва", — цытуе БЕЛТА яго словы. 

Ён заявіў, быццам сілавікі не хацелі хваляваць людзей, якія дрэнна рэагуюць, калі на вуліцах з'яўляюцца супрацоўнікі ў поўнай экіпіроўцы. "Цяжка іх за гэта асудзіць. Проста хлопцы не хацелі лішні раз, як яны кажуць, свяціцца, абараняючы людзей", — дадаў Лукашэнка. Чаму людзі кепска рэагуюць на сілавікоў у форме, ён удакладняць не стаў.

Пры гэтым Лукашэнка заявіў, быццам на месцы падзеяў прысутнічалі міліцыянты ў форме: "Так, міліцыя прысутнічала, у форме некалькі чалавек, участковы". Насамрэч на відэа, якое апублікавалі дзяржаўныя СМІ, не бачна ніводнага чалавека ў міліцэйскай форме.