Лепшымі піратэхнікамі сталі літоўцы, але беларусы былі вышэй і гучней

Тры дні каля Лагойска грымелі салюты і феерверкі. Фестываль “Навальніца” сабраў піратэхнічныя каманды з розных краін і атрымаў статус адборачнага этапу да чэмпіянату Еўропы па феерверках, які пройдзе ў наступны годзе ў Нямеччыне. Перамаглі ў першым беларускім піратэхнічным фестывалі літоўцы з каманды
"Blikas", якія ў конкурсе выступалі апошнімі. Яны вырашылі паспрачацца
не толькі з іншымі камандамі, але і з сэрам Полам Макартні. Пад яго
песню Live and Let Die вылецелі вогненныя струмені, а неба асвятлілася
выбухамі розных колераў.

Цікава, што і сам Макартні заўсёды падчас
выканання гэтай кампазіцыі выкарыстоўвае неверагодныя феерверкі.
Вядома, літоўцы былі абмежаваныя ў сродках, а сэр Пол ужо даўно забыўся
на фінансавыя рамкі.

Тым не менш, атрымалася прыгожа, міла і без
залішняй пампезнасці. Музыка экс-бітла змянілася блізкімі кожнаму
беларусу ноткамі казачніка Рыбака: рытмічныя і “мультфільмаўскія” агні
дадалі прыгажосці “лепшаму еўрапейскаму хіту”. Таму не падпісацца пад
выбарам кампетэнтнага журы — амаль немагчыма!

Першы нядзельны выступ: свае здольнасці прадэманстравала каманда з Нямеччыны.

Беларускі народны “Scooter”, гурт Палац разам з дыджэем спалучыў фальклорныя матывы з электроннымі сэмпламі.

А гэты феерверк прапанавалі пераможцы — каманда з Літвы.

Гурт “Нео” спяваў у якасці саміх сябе і новага гурта “Матэматыка”.
Дарэчы, на самым пачатку фестывальнага дня таксама гралі ўдзельнікі
“Нео”. Праўда, былыя. Цяпер яны выступаюць пад маркай “Маркуц бэнд”.

Апошнімі свой сэт адбарабанілі Drum Extasy

Вядучыя з тэлеканала АНТ

Беларускія піратэхнікі ў конкурсе не ўдзельнічалі. Закрываючы фестываль, яны паказалі гранд-феерверк: магчыма, не самы прыгожы, але самы высокі, далёкі, гучны і самы рознакаляровы.