Вы тут

Латвія адмовіла пракуратуры Беларусі ў дапамозе па справе аб генацыдзе

Генеральная пракуратура Беларусі​ / prokuratura.gov.by

Генеральная пракуратура Латвіі адмовіла беларускаму боку ў прававой дапамозе па крымінальнай справе пра генацыд насельніцтва Беларусі падчас Вялікай Айчыннай вайны і пасляваенныя гады, расказалі ў пракуратуры.

Запыт быў адпраўлены ў чэрвені 2021 года. У ім гаварылася, што Мінск шукае факты ўдзелу нацыстаў і іх памагатых у знішчэнні насельніцтва БССР падчас акупацыі. Мінску вядома, што ў Латвіі і за яе межамі пражывае каля 400 былых латышскіх легіянераў СС. З хадайніцтвам быў перададзены і спіс прозвішчаў 22 чалавек, якія ў складзе розных падраздзяленняў супрацоўнічалі з нацыстамі.

Усе падставы, чаму латвійскі бок не стаў супрацоўнічаць па гэтым пытанні з Мінскам, невядомыя. Беларускі бок прыводзіць толькі вытрымку з адказу латвійскіх калегаў. Рыга адмовілася ад садзейнічання, таму што "выкананне запыту немінуча нанесла б шкоду суверэнітэту Латвійскай Рэспублікі, паставіла б пад пагрозу правы яе грамадзян, стварыла б рызыкі дзяржаўнай бяспецы Латвіі".

Раней беларускай Генпракуратуры ўжо адмовіла Літва. Мінскія следчыя хацелі дапытаць па гэтай справе былога прэзідэнта Літоўскай Рэспублікі Валдаса Адамкуса. У Беларусі лічаць, што Адамкус у гады вайны меў дачыненне да літоўскіх карных батальёнаў, якія дзейнічалі ў Беларусі. Усе падазрэнні Адамкус назваў абсурдам. На яго думку, афіцыйны Мінск задавальняе правакацыі, каб "адцягнуць увагу ад барацьбы беларусаў за свабоду".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.