Класкоўскі: Улады вырашылі ўзмацніць кантроль над сферай інтэрнэту
![Класкоўскі: Улады вырашылі ўзмацніць кантроль над сферай інтэрнэту](/sites/default/files/styles/gallery_main/public/2023-08/967463564fotolia715.jpg.webp?itok=i5F6AdIC)
Прызначэнне на пасаду намесніка міністра інфармацыі прадстаўніка спецслужбаў скіраванае на ўзмацненне кантролю ў сферы айчыннага інтэрнэту. Бо сёння ў Мінінфарме працуюць людзі, якія "вельмі туманна ўяўляюць сабе гэтую сферу". Такое меркаванне з нагоды прызначэння намеснікам міністра інфармацыі былога першага намесніка начальніка Аператыўна-аналітычнага цэнтра пры прэзідэнце Уладзіміра Рабаволава выказаў Еўрарадыё палітолаг Аляксандр Класкоўскі.
Класкоўскі: “Паколькі інтэрнэт сёння набывае ўсё большы ўплыў — гэта пляцоўка адноснай свабоды меркаванняў, то ўлады, я думаю, вырашылі, каб быў у гэтым ведамстве, якое ў нас не дзеля свабоды, а каб усё кантраляваць і фільтраваць, чалавек, які “сячэ фішку ў гэтым пытанні” з тэхнічнага гледзішча. Апроч таго, у яго хватка спецслужбіста, якая дапаможа, калі што, дзейнічаць маланкава і эфектыўна з гледзішча перасячэння антыдзяржаўных памкненняў як гэта наверсе разумеюць”.
Па словах Аляксандра Класкоўскага, тактыка беларускіх уладаў — “трымаць руку ў мяккай пальчатцы на горле байнэту”. І на пасаду намесніка міністра інфармацыі прыйшоў адмыслова пад гэтую задачу “заточаны” чалавек.
Нагадаем, 13 чэрвеня кіраўнік Беларусі зрабіў шэраг прызначэнняў.