Кіроўца хацеў на мытні схаваць незадэклараваную апаратуру ў суседняй машыне
Супрацоўнікі Брэсцкай мытні злавілі кіроўцу фуры на спробе правезці праз мяжу дарагую апаратуру без дэкларавання, паведамляе прэс-служба Мытнага камітэта.
Жыхар Брэсцкай вобласці ехаў на аўтацягніку МАN праз пункт пропуску "Казловічы". У машыне ён вёз шасі для грузавых аўтамабіляў. У кабіне ён вёз дарагую тэхніку, ад якой паспрабаваў пазбавіцца падчас мытнага кантролю. Мужчына стаў перакладаць у кабіну суседняй машыны незадэклараваную лічбавую камеру для хуткаснай відэаздымкі "Phantom v640" і камплектуючыя да яе (прыладу прыёму, перадачы і кіравання данымі, надкамерны відэаманітор і непрамакальны чахол).
Мытнікі забралі гэтую тэхніку да рашэння суда. Агульны кошт яе — больш за 25 тысяч рублёў.
На мужчыну склалі адміністрацыйныя пратаколы. У дачыненні да кіроўцы, які дапамагаў хаваць у сваім аўто незадэклараваную тэхніку, вядзецца праверка.
