Кіраўніком банды, якая рабавала дальнабойшчыкаў, аказаўся міліцыянер
![Затрыманне банды](/sites/default/files/styles/gallery_main/public/2024-05/banda-mggay.jpg.jpg.webp?itok=QhLmrF_r)
Затрыманне банды / mvg.gov.by
Кіраўніком банды, якая рабавала дальнабойшчыкаў, аказаўся міліцыянер. Затрыманыя днямі налётчыкі з Оршы выдалі 27-гадовага сілавіка Міхаіла Згірскага, які служыў у Докшыцкім РАУС. Удзельнікі групоўкі распавялі, што ён планаваў рабаванні і сам удзельнічаў у нападах. Калі кіроўцы спалі, банда ўзломвала замкі грузавых адсекаў і выносіла тавары. Скрадзенае потым прадавалі ў Расіі або карысталіся ім самі, піша "Наша ніва" са спасылкай на свае крыніцы.
Цяпер з-за гэтай справы ў МУС "мегаскандал". Капітана Згірскага затрымаў КДБ. У раёне замянілі міліцэйскае начальства.
Міхаіл Згірскі служыў у аддзеле крымінальнага вышуку. Свой спецыфічны доступ да інфармацыі і веданне метадаў канспірацыі ён выкарыстоўваў у арганізацыі дзейнасці банды. У яго кватэры знайшлі іншую, адрозную ад табельнай, зброю, якая фігуравала ў заявах пацярпелых. Там жа было адзенне з арыенціровак і балаклава.
Крымінальная справа знаходзіцца на асаблівым кантролі у кіраўнікоў МУС, Следчага камітэта, Генпракуратуры і КДБ. Іншыя супрацоўнікі крымінальнага вышуку Докшыцкага РАУС часова адхілены ад службы, яны правяраюцца на магчымае дачыненне да крыміналу.
Вядома, што капітан Згірскі ўдзельнічаў у палітычных рэпрэсіях.
![Кіраўніком банды, якая рабавала дальнабойшчыкаў, аказаўся міліцыянер](/sites/default/files/styles/default_image_paragraph/public/paragraphs/image/%D0%B7%D0%B3%D0%B8%D1%80%D1%81%D0%BA%D0%B8.jpg.webp?itok=YksJZHlV)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.