Хутка ўсе шпіцы будуць у бяспецы, а ўсе дыпфэйкеры — у судзе: #ІхНоравы

28/11/2023 - 15:03

#ІхНоравы / @rubanau_collage

У Індыі кажуць, што дыпфэйк-відэа — новая пагроза дэмакратыі. Разумеем, складана думаць пра гэта, калі жывеш у Беларусі, дзе пагрозы дэмакратыі старыя.

Але пакуль Беларусь працягвае жыць па-старому, свет рухаецца наперад. І каб вы не адставалі, як заўсёды, на пяць хвілін у дзень адцягнем вас ад думак пра Беларусь аглядам навін з усяго свету.

Вяртанне з палону

У гэтыя дні можна было ўбачыць мноства кранальных відэа, на якіх выяўленыя моманты сустрэчы вызваленых ізраільскіх закладнікаў са сваімі сем'ямі. На адным з такіх відэа 12-гадовы Эйтан абдымае сваю маму — яны не бачыліся доўгія некалькі тыдняў.

Эйтана і яго бацьку ХАМАС вывез у Газу на матацыклах з кібуца Нір-Оз 7 кастрычніка. І бацьку Эйтана ўсё яшчэ не знайшлі — ён знік без вестак, піша ВВС.

У Эйтана французска-ізраільскае грамадзянства, яго бабуля Жаслін жыве ў Ніцы.

"Я адчуваю вялікую палёгку за свайго ўнука. Але паколькі я адчула ўсё, што дагэтуль адчуваюць іншыя маці і бабулі, я адчуваю боль за ўсіх тых, хто яшчэ не ўбачыў сваё дзіця вызваленым", — кажа Жаслін у інтэрв'ю France Bleu Azur.

Скоро все шпицы будут в безопасности, а все дипфейкеры — в суде — #ИхНравы

Эйтан абдымае маму, вярнуўшыся з палону / ЦАХАЛ

Некаторыя іншыя сваякі вызваленых палонных казалі тое самае: яны не змогуць па-сапраўднаму адсвяткаваць вяртанне блізкіх, пакуль іншыя сем'і працягваюць пражываць сваё гора.

Ідзе пяты дзень часовага спынення агню паміж Ізраілем і ХАМАС. Першапачаткова паводле дамовы, узгодненай пры пасярэдніцтве Катара, меркавалася чатырохдзённая паўза, але яе працягнулі яшчэ на 48 гадзін.

Гэтае пагадненне прадугледжвае вызваленне часткі захопленых у палон ізраільскіх закладнікаў. І за кожнага закладніка тэрарысты ХАМАС запатрабавалі вызваліць з ізраільскай турмы трох палестынцаў.

Акторка кажа, што падтрымка калег дапамагла ёй прайсці праз гэтую сітуацыю без страт. Але дадае: калі б нешта такое здарылася, калі яна вучылася ў школе або каледжы, яна не ўяўляе, як бы дала рады.

Індыйскі ўрад плануе распрацаваць план для сацсетак па барацьбе з дыпфэйкамі. А міністр інфармацыйных тэхналогій краіны назваў такія відэа "новай пагрозай дэмакратыі".

Мы разумеем, што расказваем вам пра гэта ў дзень, калі ў Беларусі з ператрусамі прыходзяць у кватэры, дзе прапісаныя сябры Каардынацыйнай рады. Але калі мы яшчэ не справіліся са старымі пагрозамі дэмакратыі, гэта не значыць, што новыя нас не датычаць.

Не тая барацьба

Сустрэча прэм'ераў Вялікабрытаніі і Грэцыі раптам адмянілася праз... скульптуры.

Напярэдадні сустрэчы грэцкага прэм'ера запрасілі на ВВС, а ён вазьмі ды і ўспомні, што ў Брытаніі захоўваецца частка скарбаў Парфенона. І лідар Грэцыі мяркуе, што падзяліць гэтыя скарбы паміж дзвюма краінамі — усё роўна што разрэзаць напалову "Мону Лізу". І заклікае Брытанію вярнуць скульптуры, каб людзі маглі ацаніць іх "у арыгінальнай абстаноўцы" — то-бок у Грэцыі.

Неўзабаве пасля гэтай заявы Даўнінг-стрыт адмяніла сустрэчу прэм'ераў без тлумачэння прычын. Прапанавалі сустрэцца з намеснікам Рышы Сунака, але грэкі адмовіліся. Але Лондан не хоча абмяркоўваць тэму вывезеных скарбаў.

Што гэта за скарбы такія? Частка скульптур была вывезеная з Грэцыі ў Брытанію дыпламатам лордам Элджынам яшчэ ў пачатку XIX стагоддзя. Лорд быў аматарам мастацтва і лічыў, што ў Брытаніі скульптурам будзе лепш, чым у паўразбураным на той момант Парфеноне. Так яны і захоўваюцца ў Брытанскім музеі з 1832 года.

У Кансерватыўнай партыі Брытаніі кажуць, што гэтыя скульптуры — частка пастаяннай калекцыі Брытанскага музея і належыць яму. У Грэцыі, як вы зразумелі, лічаць інакш.

Апазіцыя Брытаніі мяркуе, што прэм'ер рышы Сунак трошкі не туды ваюе:

— Ён мусіў гаварыць пра эканоміку, іміграцыю, пра Блізкі Усход — гэта тое, чаго краіна чакае ад лідара.

А пакрыўдзіцца на саюзніка па NATO праз скульптуры — гэта, маўляў, не тая барацьба. Тлумачыць невядомае праз вядомае — гэта прыкладна як пачаць высвятляць, чый Міцкевіч, у разгар рэпрэсій у Беларусі і вайны ва Украіне.

Хопіць есці сабак

Уладальнікі паўднёвакарэйскіх рэстаранаў праводзяць акцыі пратэсту перад парламентам і будынкам урада, піша "Холод". Яны патрабуюць не забараняць есці сабак. А асацыяцыя вытворцаў сабачага мяса кажа, што выпусціць на вуліцы Сеула два мільёны шпіцаў, калі забарона ўступіць у сілу.

Кіроўная партыя гатовая найбліжэйшым часам прадставіць закон. Калі яго прымуць, то забарона ўступіць у сілу ў 2027 годзе. А да гэтага рэстараны, бойні і сабачыя фермы павінныя прадставіць планы паэтапнай адмовы ад сабачага мяса.

Для ежы ў Карэі гадуюць спецыяльную пароду сабак — карэйскага жоўтага шпіца.

Групы па абароне правоў жывёл, вядома, законапраект ухвалілі. А вось людзі з традыцыяналісцкімі поглядамі рэзка супраць і настойваюць, што індустрыя павінная прапрацаваць яшчэ мінімум дваццаць гадоў, каб карэйцы ва ўзросце маглі не адмаўляцца ад любімых страваў.

Зрэшты, попыт на сабачае мяса ў Карэі сапраўды падае. Так што калі ў вас ёсць знаёмыя карэйцы, перастаньце пытаць у іх пра сабак — хутчэй за ўсё, іх гэта раздражняе.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.