Вы тут

КДБ называе “чуткамі” версію, што яны затрымалі і перадалі ФСБ Паўла Грыба

Павел Грыб, фота з Фэйсбука Ігара Грыба

Праверкай інфармацыі пра выкраданне невядомымі ў Гомелі ўкраінскага грамадзяніна Паўла Грыба займаецца МУС, і таму КДБ каментаваць яе адмаўляецца. Нейкі каментар можа з’явіцца толькі па выніках праведзенай праверкі, заявіў Еўрарадыё кіраўнік прэс-службы Камітэта дзяржбяспекі Беларусі Дзмітрый Пабяржын.

Прадстаўнік КДБ звяртае ўвагу на факт, што на тэрыторыі Беларусі ні ФСБ, ні спецслужбы іншых краін працаваць не могуць — толькі беларускія праваахоўныя структуры.

Пабяржын: “Існуюць працэдуры міжнароднай дапамогі, існуюць дамовы паміж Рэспублікай Беларусь і нашымі партнёрамі іншых краін. У тым ліку — па затрыманні злачынцаў, якія знаходзяцца ў міжнародным вышуку. Існуюць нашы абавязанні перад міжнароднымі праваахоўнымі структурамі, да прыкладу, Інтэрполам, якія мы павінныя ў адпаведнасці з гэтымі дамовамі рэалізоўваць. І калі паступае запыт, то мы ў межах гэтых дамоў, канечне ж, і дзейнічаем”.

Каментаваць версію, што Паўла Грыба затрымалі беларускія сілавікі і перадалі расійскім калегам у абыход працэдуры экстрадыцыі, Дзмітрый Пабяржын адмаўляецца. Прадстаўнік КДБ кажа, што гэта “чуткі, якія найперш з’яўляюцца ў “жоўтай прэсе” і якія не варта каментаваць”.

Што да праверкі, якую праводзіць МУС, то ніякай інфармацыі на гэты конт пакуль няма, кажа кіраўнік прэс-службы гэтага ведамства Канстанцін Шалькевіч.

Як паведамляла Еўрарадыё, 19-гадовы грамадзянін Украіны Павел Грыб прыехаў у Гомель для сустрэчы з Таццянай з расійскага горада Сочы 24 жніўня. У гэты ж дзень Павел мусіў вярнуцца на радзіму, але дома так і не з’явіўся. 28 жніўня бацька зніклага хлопца Ігар Грыб выступіў з заявай, што яго сына з тэрыторыі Беларусі выкралі супрацоўнікі ФСБ. 29 жніўня Еўрарадыё з неафіцыйных крыніц стала вядома, што Паўла ўтрымліваюць у СІЗА ў Краснадары. Але афіцыйнае пацверджанне гэтага з’явілася толькі 7 верасня. Як паведамляе ТАСС, у дачыненні да Паўла Грыба прымененая мера стрымання ў выглядзе арышту на два месяцы. Рашэнне гэтае нібыта было вынесенае Кастрычніцкім раённым судом Краснадара 17 жніўня. Такім чынам, піша ТАСС, праваахоўныя органы Расіі арыштавалі Паўла Грыба да 17 кастрычніка.