Кандыдаты сустракаюцца з выбаршчыкамі ў лазнях, "на шашлыках" і ў кватэрах

Цягам апошніх месяцаў прэтэндэнты на пасаду прэзідэнта актыўна вандруюць па краіне і сустракаюцца са сваімі паплечнікамі і патэнцыйнымі выбарнікамі. Але як даведалася Еўрарадыё, спатканні гэтыя часцей за ўсё адбываюцца ў памяшканнях, вельмі далёкіх ад шыкоўных. Ды і іншых акалічнасцяў хапае.

Намеснік старшыні Аб’яднанай грамадзянскай партыі Яраслаў Раманчук выклаў у інтэрнэце здымкі са сваіх апошніх сустрэч у рэгіёне. Антураж некаторых памяшканняў уражвае: у адным месцы — падрапаныя сцены без шпалер, другое ўвогуле нагадвае ці то закінутую вясковую хату, ці то хлеў.



Але сам палітык ставіцца да сустрэч у такіх памяшканнях з разуменнем і гумарам.

Яраслаў Раманчук: “Што тычыцца кватэры, то яна была выкупленая сябрамі Хельсінскага камітэта ў Воршы. Яна яшчэ не абсталяваная, не зробленая, але гэта адзінае месца, дзе яны маглі нас прыняць. А другі здымак — гэта ў Вілейцы, у доме, які толькі пачаў рамантавацца. Прыйшлі людзі, а следам міліцыя, якая сказала, што яны там наркотыкі шукаюць”.



Але, кажа, галоўнае не антураж, а людзі. Раманчук сцвярджае, што зважае не на тое, дзе праходзіць сустрэча, а на тое, хто на яе прыходзіць. І кажа, што даўно прывык да сітуацый, калі ўлады на месцах адмаўляюць апазіцыянерам у прыстойных памяшканнях.

Яраслаў Раманчук: “Спатканні на шашлыках, за кавай у кавярні — гэта стандартны спосаб сустрэчаў з людзьмі, абмеркавання розных планаў. Такіх сустрэч было шмат: і ў Гродне, і ў Брэсце, і ў Бабруйску. Такіх сітуацый вельмі і вельмі шмат”.

А вось лідар “Еўрапейскай кааліцыі” Мікола Статкевіч прыгадаў, як даводзілася праводзіць спатканні ў лазні альбо ў кустах за царквой у вёсцы Блонь.

Мікола Статкевіч: “Мне даводзілася праводзіць сустрэчы на прыватных сядзібах, у лазнях прыватных. Пра кватэры я нават і не кажу. На шашлыках у лесе пад выглядам дня нараджэння. А калі я сядзеў на "хіміі", то там мы спачатку сустрэчу каардынацыйнага камітэта “Еўрапейскай кааліцыі” праводзілі ў вёсцы Блонь за царквой. Там тэрыторыя агароджаная, і там мы з Божай ласкай збіраліся. А калі стала цёпла, то збіраліся каля рэчкі, на беразе, на палянцы ў кустах”.



Ды і цяпер, кажа, падчас паездак па рэгіёнах часта здараюцца вельмі падобныя сітуацыі.

Лідар кампаніі “Гавары праўду!” Уладзімір Някляеў прызнаўся, што толькі на дзень прэзентацыі старту кампаніі ён здолеў арандаваць канферэнц-залу аднаго са сталічных гатэляў. З той пары ўсе сустрэчы вымушана адбываюцца ў нейкіх дзіўных месцах.

Уладзімір Някляеў: “За ўвесь час, калі я спрабую прабіцца да тых людзей, якія прыйдуць у дзень выбараў галасаваць за Лукашэнку ці за яго суперніка, я ніводнага такога месца, якое б адпавядала задачы маіх сустрэч, не знайшоў. Мне яго не далі. Гэта нейкая рэчка, дзе выдумляем, што на шашлыкі прыехалі, гэта можа быць лес ці нейкія хаты пры дарозе, з таго, што называецца сельскагаспадарчым турызмам”.



Больш за тое, паводле словаў Някляева, амаль ніводнага разу яму не выпадала спакойна дабрацца да месца сустрэчы. Чамусьці машына, на якой едзе паэт-палітык, выклікае падазрэнні ў ДАІ і яе спыняюць, каб праверыць — ці не крадзеная.

Лідар руху “За свабоду” Аляксандр Мілінкевіч таксама шмат сустракаецца з людзьмі. Але яго сустрэчы праходзяць у нармальных памяшканнях, і нават машыну міліцыянты не спыняюць. Што насцярожвае нават самога палітыка.

Аляксандр Мілінкевіч: “Сустрэчы былі на кватэрах — на падворку дзяжурылі супрацоўнікі КДБ і міліцыя, сустрэчы былі каля храмаў вялікія — па 300 чалавек прыходзіла ў Мінску, у Брэсце. У Гомелі ёсць дом у дэмакратаў, у Магілёве ёсць дом, у Віцебску, у Гродне — мы збіраемся, і там па 100 чалавек спакойна прыходзіць. Дарэчы, зараз міліцыя больш асцярожна дзейнічае. Я езджу па краіне, і мяне ні разу не спынілі. Ажно неяк прыкра — ніякай павагі няма!”



Намеснік старшыні Партыі БНФ Рыгор Кастусёў пахваліўся, што яму дзеля сустрэч з людзьмі хавацца па кустах ды лазнях не даводзілася. Затое выпадала бываць на фермах і на рынках.

Рыгор Кастусёў: “Сустрэчы былі і на фермах, і на рынках, і каля завадскіх прахадных. І на вуліцах былі нечаканыя сустрэчы — размаўляць даводзілася з людзьмі. Я не хаваўся нідзе па лазнях і кустах, але ў Палацы рэспублікі таксама не было сустрэч!”



А сустаршыня аргкамітэта па стварэнні партыі “Беларуская хрысціянская дэмакратыя” Віталь Рымашэўскі шчыра прызнаўся, што ўсе яго сустрэчы праходзілі ў прыстойных памяшканнях. Ні табе шашлыкоў, ні лазняў, ні аграсядзіб, ні фермаў з рынкамі. А самай запамінальнай назваў сустрэчу гэтым летам на беразе возера ў Міёрскім раёне.

Фота: Змітра Лукашука і з інтэрнэт-старонкі Яраслава Раманчука