Канцэрт N.R.M. у "Графіці". Фотарэпартаж

13/07/2008 - 14:02

10 ліпеня ў закусачнай “Графіці” “N.R.M.” адыграў акустычны канцэрт. Нягледзячы на тое, што літаральна месяц таму ў гурта адбыўся вялікі канцэрт у к/з “Мінск”, жадаючых яшчэ раз дакрануцца да творчасці сваіх куміраў было вельмі шмат. Прапануем вашай увазе фотарэпартаж з канцэрту.

Распачаўся канцэрт песняй, якая, безумоўна, займае ў творчасці гурта асобнае месца – з першымі акордамі кампазіцыя “Паветраны шар” падняла усіх з крэслаў і на 2 гадзіны ператварыла закусачную ў суцэльны танцпляц.

Музыкі шмат жартавалі і размаўлялі са слухачамі, па-добраму здзекаваліся адзін з аднаго. Маэстра Піт Паўлаў, паводле словаў Лявона Вольскага, вырашыў паспадзявацца на свае галасавыя звязкі і таму ўвесь канцэрт спяваў без мікрафона.

Як і заўжды гэта бывае на акустычных канцэртах "N.R.M.", усе жадаючыя дасылалі гурту цыдулкі з пытаннямі. Музыкі разам са слухачамі паразважалі наконт праблемаў у сучасным грамадстве, часу з’яўлення якаснай музыкі на FM і, натуральна, адказалі на шмат пытанняў пра адмену выступу на фестывалі “Басовішча” гуртоў “Zet” і “N.R.M".

Найапошнейшую пасля 2-х “бісаў” песню вечара “Бывай” публіка спявала хорам, а да самаго гурта ў якасці “бэк-вакаліста” далучыўся сын Піта Паўлава Ян-Вінсэнт.

Напрыканцы лідэр “N.R.M.” паабяцаў вярнуцца ў “Графіці” з канцэртам восенню.