Каля Оршы мужчына параніў міліцыянера і ўцёк у лес, яго шукалі ўнутраныя войскі
![Каля Оршы мужчына параніў міліцыянера і ўцёк у лес, яго шукалі ўнутраныя войскі](/sites/default/files/styles/gallery_main/public/2023-08/970353361fotolia715.jpg.webp?itok=6NJIsvSu)
У Аршанскім раёне мужчына напаў на міліцыянераў, пасля чаго ўцёк у лес. Здарэнне адбылося 29 сакавіка ў вёсцы Хімінічы. Туды прыехалі з горада Барань участковы міліцыянер і ўпаўнаважаны групы крымінальнага вышуку. Яны правяралі інфармацыю пра датычнасць мясцовага жыхара (1970 года нараджэння) да ўзгарання лецішча ў вёсцы Пагосцік.
Як інфармуе афіцыйная прадстаўніца УУС Віцебскага аблвыканкама Вольга Шкуратава, праваахоўнікі знайшлі мужчыну на ўскраіне вёскі. Аднак размовы не атрымалася: “мужчына стаў весці сябе агрэсіўна і дастаў нож”. Яго паспрабавалі затрымаць, але вясковец здолеў адбіцца — аднаму міліцыянеру (участковаму) ён распыліў у твар слёзацечны газ, іншаму нанёс некалькі ўдараў нажом і ўцёк.
Інфармацыя пра здарэнне, відавочна, вельмі хутка трапіла ў Мінск. У Аршанскім раёне і ў бліжэйшых раёнах Віцебскай і Магілёўскай абласцей быў уведзены спецыяльны план па затрыманні ўцекача. Праваахоўнікі дапускалі, што ён можа перайсці ў Расію. Па трывозе паднялі ўвесь асабісты склад аршанскай міліцыі, віцебскага АМАП. Да аперацыі падключылі вайскоўцаў унутраных войскаў. Праз чатыры гадзіны мужчыну заблакавалі каля чыгуначнага пераезду вёскі Дзятлава. Там яго і затрымалі. Пры сабе ў вяскоўца былі два нажы. Цяпер зламыснік знаходзіцца ў ізалятары часовага ўтрымання.
Крымінальную справу распачалі па артыкулах “Замах на забойства” і “Забойства супрацоўніка органаў унутраных спраў”. Што да параненага міліцыянера, то ён знаходзіцца ў рэанімацыі.