Каля цеплатрасы ў Бялынічах знайшлі цела нованароджанага дзіцяці
![Каля цеплатрасы ў Бялынічах знайшлі цела нованароджанага дзіцяці](/sites/default/files/styles/gallery_main/public/2023-08/sk_shylda.jpg.webp?itok=QM2XDk6B)
У Бялынічах каля цеплатрасы на вуліцы Целешава 4 красавіка знайшлі цела нованароджанага хлопчыка. Упраўленне Следчага камітэта па Магілёўскай вобласці пачало крымінальную справу за прычыненне смерці па неасцярожнасці.
Падчас агляду выявілася, што роды праходзілі па-за медыцынскай установай. Прычыну смерці дзіцяці высветляць эксперты ўпраўлення Дзяржаўнага камітэта судовых экспертыз па Магілёўскай вобласці.
Праваахоўнікі высвятляюць яго біялагічную маці. З гэтай прычыны яны звяртаюцца да грамадзян, якія маюць інфармацыю пра жанчыну, якая мела знешнія прыкметы цяжарнасці, а цяпер іх не мае, як не мае і нованароджанага дзіцяці.
Інфармацыю, якая дапаможа раскрыць злачынства, просяць паведамляць па тэлефонах 102, 8 (02232) 5-19-40 або +375-333-99-40-04 (МТС). Ананімнасць гарантуецца.