Іран атакаваў базы ЗША і Ізраіль: удары па Бахрэйне, Кувейце, Катары і ААЭ

Тэгеран нанёс удары па ваенных базах ЗША на Блізкім Усходзе і па Ізраілі ў адказ на масіраваныя атакі з іх боку. Як паведамляе іранскае выданне Fars, ракетны ўдар быў нанесены па амерыканскай базе ў Бахрэйне, які з’яўляецца ключавым саюзнікам Вашынгтона ў Персідскім заліве і пастаянным месцам дыслакацыі штаб-кватэры Пятага флоту ВМС ЗША (у сталіцы краіны Манаме). Паводле звестак Bahrain News Agency, пад удар трапіў сэрвісны цэнтр Пятага флоту.

Выбухі былі зафіксаваныя і ў Кувейце, у якім таксама размешчаны ваенныя базы ЗША, дзе, паводле ацэнак, раскватараваны да 13 500 амерыканскіх вайскоўцаў.

Акрамя гэтага, Іран ударыў па Катары як мінімум дзвюма ракетамі. Мінабароны краіны паведаміла, што яе арміі "ўдалося паспяхова прадухіліць шэраг атак, накіраваных супраць тэрыторыі краіны… усе ракеты былі перахоплены да дасягнення тэрыторыі Катара" з дапамогай сістэмы Patriot. Пасля гэтага, як піша Al Jazeera, у сталіцы Катара Досе прагрымелі выбухі.

Выбухі таксама прагрымелі ў сталіцы ААЭ Абу-Дабі, паведамілі Reuters відавочцы, над горадам падымаўся дым. Паводле інфармацыі Fars, мэтамі атак Ірана былі авіябазы ЗША Аль-Удэйд у Катары, Аль-Салем у Кувейце і Аль-Дафра ў ААЭ, а таксама "Пятая амерыканская база ў Бахрэйне".

Ізраіль таксама падвергся ракетным абстрэлам з боку ісламскай рэспублікі: паветраная трывога абвяшчалася ў розных рэгіёнах краіны.