Іх норавы: скарбашукальнікі зводзяць з глузду вёску, у Бразіліі — трапічны штурм

Кароткі агляд сусветных навін / калаж Улада Рубанава, Еўрарадыё
Кароткі агляд сусветных навін / калаж Улада Рубанава, Еўрарадыё

Што адбываецца зараз у каралеўскай сям'і і вакол яе вы ведаеце і без нас. Так што ў гэтым аглядзе не будзе ні слова пра прынца Гары і яго стасункі з братам, чытайце смела. Ці слухайце на любой зручнай платформе. 
 

Нацысцкае золата

Ахвотнікі да скарбаў зводзяць з глузду галандскую вёску, распавядае ВВС. Ва ўсім вінаваты Нацыянальны архіў Нідэрландаў, які рассакрэціў спецыфічны дакумент: карту скарбаў. На ёй нібыта адзначанае месца, дзе нямецкія салдаты закапалі скрыні, набітыя дыяментамі, рубінамі, золатам і срэбрам.

Вёска, у якой, як мяркуецца, закапаныя скарбы, знаходзілася непадалёк ад лініі фронту. У архіве ёсць сведчанні нямецкага салдата. Ён распавёў, што ў гарадскі банк, размешчаны недалёка ад гэтай вёскі, у 1944 годзе трапіла бомба. І ўсё змесціва сховішча — залатыя гадзіннікі, каштоўныя камяні, манеты — раскідала па вуліцы.

Некалькі салдат-акупантаў прысабечылі, што маглі. І схавалі здабычу ў скрынках з боепрыпасамі і пакетах з хлебам. А пазней, калі немцы адступалі, яны, мабыць, вырашылі прыкапаць скарб у суседняй вёсцы.

І зараз усю гэтую вёску перакапалі скарбашукальнікі-нелегалы. Лясы, палі — усё!

"Я не магу спаць", — кажа адна мясцовая жыхарка. У яе садзе скарбашукальнікі таксама выкапалі яму.

“Я пераехаў сюды ў пошуках цішыні і спакою. А цяпер пра нас ведае ўвесь свет", — скардзіцца іншы.

Напэўна, вы ўявілі, што месца са скарбам адзначана на карце чырвоным крыжам. Дык вы ўявілі правільна! Не ведаем, на што разлічваў Нацыянальны архіў, публікуючы такое.

Іх норавы: скарбашукальнікі зводзяць з глузду вёску, у Бразіліі — трапічны штурм
Тая самая карта / Reuters

Гэй, калі вы рванулі купляць квіток на лаўкост да Нідэрландаў — спачатку хоць бы дачытайце наш агляд!
 

Трапічны штурм Капітолія

Памятаеце, як экс-прэзідэнта Бразіліі Жаіра Балсанару называлі "трапічным Трампам"? Падобна, што гэта было даволі трапнае вызначэнне, таму што пасля паразы Балсанару на выбарах мы ўбачылі фактычна "трапічны штурм Капітолія".

Іх норавы: скарбашукальнікі зводзяць з глузду вёску, у Бразіліі — трапічны штурм
Пратэсты ў Бразіліі / Eraldo Peres/AP

Прыхільнікі Балсанару штурмавалі Кангрэс і Прэзідэнцкі палац у сталіцы-горадзе Бразіліа, распавядае CNN. Адным сказам пра тое, што там дзеялася: калі пратэстоўцы паспрабавалі падпаліць кілім у будынку Кангрэса, спрацавала сістэма пажаратушэння і памяшканне заліло вадой. Наогул, больш за тысячу чалавек былі арыштаваныя.

Не праводзіць аналогій з ЗША тут даволі складана. Бразілія — найбуйнейшая паўднёва-амерыканская дэмакратыя. І грамадства падзеленае. У гэтым кастрычніку да ўлады прыйшоў левы прэзідэнт Лула да Сілва, але няма падстаў сцвярджаць, каб гэта была "ўпэўненая і ўсёабдымная перамога" над правым Балсанару.

Калі вам мала аналогій, раскажам, што пацярпелы паразу Балсанару нібы на самой справе па прыкладзе Трампа пачаў сумнявацца ў легітымнасці галасавання. А суд назваў яго заявы аб тым, што машыны для галасавання быццам бы выйшлі са строю "смеху вартымі і незаконнымі". Патрабуем прэмію для таго, хто пабудуе дэмакратыю, не падобную на гэтую. Дакладней, на гэтыя.
 

Пратэсты ў Іране

У Іране нічога не скончылася, урад працягвае распраўляцца з пратэстамі. Цяпер на пяць гадоў зняволення асудзілі Фаэзе Хашамі, дачку былога прэзідэнта Ірана, піша CNN са спасылкай на яе адваката.

Разумеем ваша здзіўленне: сапраўды, нават у Іране прэзідэнты мяняліся.

Паводле звестак Дзяржаўнага іранскага агенцтва ISNA, летась Фаэзе Хашамі выставілі абвінавачванні ў прапагандзе супраць сістэмы. Для яе гэта не першы арышт. У 2012 годзе Фаэзе правяла некалькі месяцаў у турме за антыўрадавыя выступы.

Іх норавы: скарбашукальнікі зводзяць з глузду вёску, у Бразіліі — трапічны штурм
Дачка экс-прэзідэнта Ірана Фаэзе Хашамі / AFP

І яна не адзіная вядомая актывістка, якую Іран не пасаромеўся асудзіць пасля таго, як краіна выбухнула антыўрадавымі пратэстамі ў 2022 годзе. Іран прывёў у выкананне ўжо чатыры смяротныя прысуды. І яшчэ некалькім дзясяткам чалавек прысудзілі смяротнае пакаранне.
 

Развітанне з Вествуд

А заснавальніка “Вікілікс” Джуліяна Асанжа не адпусцілі з турмы на пахаванне мадэльера Вів'ен Вествуд, піша The Guardian са спасылкай на членаў сям'і Вествуд.

Мадэльерка была даўнім сябрам і прыхільніцай Асанжа. У 2020 годзе ВВС расказвала, як Вествуд падвесіла сябе ў велізарнай птушынай клетцы ля будынка Цэнтральнага крымінальнага суда ў Лондане — яна пратэставала супраць зняволення стваральніка Вікілікс.

І менавіта Вів'ен Вествуд распрацавала дызайн сукенкі для нявесты Джуліяна — Стэлы. У гэтай сукенцы Стэла і з'явілася ў турме Белмарш у мінулым годзе, каб афіцыйна стаць жонкай Асанжа.

Іх норавы: скарбашукальнікі зводзяць з глузду вёску, у Бразіліі — трапічны штурм
Вів'ен Вествуд падтрымлівае Ассанжа ў 2020 годзе / AFP

І яшчэ пры жыцці Вествуд прасіла Асанжа прысутнічаць на яе пахаванні. Але яго не адпусцілі з турмы.

Члены сям'і мадэльеркі сказалі, што расчараваныя, але не здзіўленыя.

— Джуліян не быў асуджаны за нейкае злачынства, але з ім абыходзяцца так, як быццам бы ён тэрарыст. Адзінае, у чым ён вінаваты — гэта публікацыя праўды.
 

"Трэба проста ёй кіраваць"

І кароткая гісторыя, якая матывуе. Жанчыны змогуць стаць пілотамі “Формулы-1”, піша Bloomberg. Акадэмія “Формулы” будзе рыхтаваць іх да ўдзелу ў бітве за гран-пры.

За ўсю гісторыю “Формулы” ў ёй удзельнічалі толькі 5 жанчын. Апошнім разам жанчына сядзела за рулём аўто ў спаборніцтвах 1976-га, і гэта была італьянка Лела Ламбардзі.

Перад тым, як сесці за стырно аўтамабіля ў “Формуле-1”, яна кіравала фургонам, на якім вазіла прадукты для мясной крамы, што належала яе сям'і.

Калі журналіст спытаў у Лелы, як гэта — пілатаваць такую вялікую машыну, яна адказала: “Мне не трэба было яе цягаць, мне проста трэба было ёй кіраваць”.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі