Іх норавы: радыкальнае рашэнне для дакучлівай песні і гірлянда ў блэкаўт
![Кароткі святочны агляд міжнародных навін ад Еўрарадыё / калаж Улада Рубанава, Еўрарадыё](/sites/default/files/styles/main_image_watermark_/public/2023-08/374.jpg.webp?itok=sdBZ-GG3)
Кароткі святочны агляд міжнародных навін ад Еўрарадыё / калаж Улада Рубанава, Еўрарадыё
Калі вакол мала добрых навін, значыць, трэба пашырыць радыус пошуку. Гэта спецыяльны пераднавагодні агляд сусветных навін ад Еўрарадыё. Тут з вамі не здарыцца нічога страшнага.
А дзе чытаць страшныя навіны, вы ведаеце самі. Так, таксама на Еўрарадыё.
Няма часу чытаць? Слухайце нас на любой зручнай платформе.
"Не хачу вас чуць"
Мастачка Ханна падчас вучобы падпрацоўвала ў кавярні. Аднойчы яе бос прынёс на працу дыск з найлепшымі каляднымі песнямі, сярод якіх была Last Christmas групы Wham. Ханна запэўнівае, што за адзін працоўны дзень песня гучала 111 разоў!
Праз гады Ханна вырашыла адпомсціць песні і разам з мужам яны запусцілі збор сродкаў, распавядае The Mirror. Яны хочуць выкупіць аўтарскія правы і жыць з пэўнасцю, што больш ніколі яе не пачуюць. На гэты час пара сабрала больш за 60 тыс. долараў. Засталося яшчэ каля 15 млн долараў — і ўсё, вы больш ніколі не пачуеце Last Christmas!
Гурт паабяцаў, што калі Ханна даб'ецца поспеху, то майстар-запіс песні ад 1984 года выкінуць на палігон ядзерных адходаў. Калі вы любіце Last Christmas, не ўпадайце ў роспач, да таго моманту, як Ханна збярэ 15 млн даляраў, вы паспееце паслухаць песню яшчэ як мінімум 111 раз.
І гэта, аматары папулярных калядных песень, нават калі Ханна дасягне жаданага, у нас з вамі застанецца Мэрая Кэры!
Чаявыя ў ранішнюю змену
А ў ЗША афіцыянтка з невялікага штата Вісконсін выйшла папрацаваць у ранішнюю змену на Каляды. І атрымала 1000 долараў чаявых!
Кэлі Блю працуе ў звычайнай закусачнай. Раніцай, 25 снежня, яна як звычайна разгаварылася з кліентам. А ён аказаўся выканаўчым дырэктарам аднаго з мясцовых клубаў, які штогод праводзіць калядную дабрачынную акцыю. Пра гэта распавядае Fox News.
Сёлета ў рамках акцыі ўдалося сабраць 100 тыс. долараў, у асноўным гэта былі мэтавыя зборы на дапамогу людзям, якія жывуць у нястачы. Але некалькі донараў папрасілі, каб іх ахвяраванні пайшлі менавіта на буйныя чаявыя.
Кэлі сказала, што ставілася да шчодрага госця гэтак сама, як да любога, хто заходзіць у кавярню. А той быў уражаны яе прыязнасцю. Гэта ж трэба, у ранішнюю змену!
Увогуле, мы расказваем гэтую гісторыю на выпадак, калі вам давядзецца бліжэйшым часам працаваць у святочную раніцу. Тысячу долараў не абяцаем, проста адчайна шукаем словы падтрымкі.
Колькі гадзін вы гатовыя прастаяць у чарзе?
А немцы гатовыя стаяць па 12 гадзін. У папярэднія 2 гады праз пандэмію продаж і запуск феерверкаў у Нямеччыне забаранялі — так спрабавалі не дапусціць збору людзей у адным месцы. У гэтым годзе забарону знялі, і Bild піша пра велізарныя чэргі да спецыялізаваных крамаў. Часам людзі займаюць чаргу з вечара!
![Іх норавы: радыкальнае рашэнне для дакучлівай песні і гірлянда ў блэкаўт](/sites/default/files/styles/default_image_paragraph/public/paragraphs/image/sparkler-gece8bfd09_1920.jpg.webp?itok=pnPm2Pwc)
Ну а мы ўслед за Bild нагадваем: неасцярожнае абыходжанне з піратэхнікай пагражае траўмамі, ад феерверкаў пакутуюць птушкі, а яшчэ пры запуску феерверкаў у паветра выкідаюцца шкодныя часціцы.
І гэта не кажучы пра тое, што за адмову ад феерверкаў вам вельмі падзякуюць людзі, якія ў гэтым годзе бачылі і чулі сапраўдныя выбухі.
Як падлучыць ялінку ў блэкаўт
Дарэчы, а ці ведаеце вы, чаму свеціцца ялінка на вакзале ў Кіеве, нягледзячы на блэкаўт і абстрэлы? Таму што гірлянды далучылі да велагенератара, пісала ВВС.
War? Blackout? No Christmas tree?
— Alexander Kamyshin (@AKamyshin) December 17, 2022
You never guess what we invented :))) pic.twitter.com/uKQKPIWeW3
Старшыня праўлення ўкраінскай чыгункі Аляксандр Камышын паказваў у Твітары, як гэта працуе. Уласна кажучы, менавіта так, як вы сабе гэта ўявілі: на вакзале ўсталявалі велатрэнажор, а гірлянда загараецца, калі хтосьці пачынае круціць педалі.
Мы спадзяемся, што гэта відэа дасць надзею на лепшае усім, хто напрыканцы года апусціў рукі. Нягледзячы ні на што, працягвайце круціць педалі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.