Іх норавы: трывогі Байдэна, знікненне каал і адзін стол, які нельга не заўважыць
![Кароткі агляд сусветных навін / калаж Улада Рубанава, Еўрарадыё](/sites/default/files/styles/gallery_main/public/2023-08/51_0.jpg.webp?itok=auWWNEz0)
Кароткі агляд сусветных навін / калаж Улада Рубанава, Еўрарадыё
Джо Байдэн нагнятае: ад парад амерыканцам з'ехаць з Украіны ён пераходзіць да заклікаў з'ехаць як мага хутчэй. Дальнабойшчыкі не супакойваюцца: пратэсты з фурамі супраць кавід-абмежаванняў перакінуліся з Канады ў Еўропу.
Але галоўнае — атрыманы адказ на асноўнае пытанне тыдня: навошта ў Крамлі захоўвалі такі доўгі стол?
Пытанні за сталом
У пачатку тыдня інтэрнэт абжартаваў гіганцкі стол, за якім сядзелі ў часе перамоваў прэзідэнты Расіі і Францыі Уладзімір Пуцін і Эмануэль Макрон. У сярэдзіне тыдня інтэрнэт здзіўляўся: з якой такой прычыны расійскі лідар ад Макрона адгарадзіўся сталом, а з кіраўніком Казахстана Касымам Такаевым нават абняўся!
І да канца тыдня ўсё стала на свае месцы. Аказваецца, Макрон адмовіўся здаць тэст на каранавірус перад сустрэчай з Пуціным, высветлілі ў Reuters.
Топ самых длинных сооружений в мире:
— Приключения Кратоса в России (@kratos_v_rossii) February 7, 2022
5. Новогеоргиевская крепость, 2250м
4. Клистронная галерея, 3073м
3. Форт Раникот, 8600м
2. Великая китайская стена, 8851км
1. Стол, за которым сидели Путин и Макрон, длина до сих пор не подсчитана
Папярэджваючы вашыя пытанні: не, Макрон не кавід-дысідэнт. Ён здаў тэст перад вылетам і яшчэ адзін тэст па прылёце — маніпуляцыі праводзіў асабісты лекар французскага лідара. І вось ад трэцяга тэста Макрон адмовіўся. Таму што нельга дапусціць, каб расіяне атрымалі ДНК французскага прэзідэнта. Прынамсі, так кажуць крыніцы Reuters.
Але ўсе выдатна разумелі, што значыць адсутнасць поціску рукі і гэты доўгі стол, дадаюць крыніцы. Мы мяркуем, што людзі з каманды Макрона першымі ж і палезлі ў твітар шукаць вашы мемы.
Тэрмінова ўцякаць
Прэзідэнт ЗША Джо Байдэн заклікаў амерыканцаў тэрмінова пакінуць Украіну. У інтэрв'ю NBC News ён сказаў, што амерыканскія грамадзяне павінны з'язджаць неадкладна. Яшчэ на пачатку тыдня рыторыка была спакайнейшая: Байдэн казаў, што для амерыканскіх грамадзян было б разумным пакінуць Украіну.
![Их нравы: тревоги Байдена, исчезающие коалы и один мировой стол](/sites/default/files/styles/round_photo/public/paragraphs/quote/60651639303.jpg.webp?itok=xZW-z-xH)
"Справа можа вельмі хутка набыць шалёны абарот", — цытуе ВВС.
Адпраўляць амерыканскія войскі ва Украіну для эвакуацыі амерыканцаў прэзідэнт не плануе. Тлумачыць так:
"Калі амерыканцы і Расія пачнуць страляць адно ў аднаго — гэта сусветная вайна".
А што плануе? Байдэн мае намер сёння стэлефанавацца з лідарамі Брытаніі, Германіі, Францыі, Італіі, Польшчы, Канады, ЕС і НАТА па Украіне, цытуюць Блумберг у РІА Новости.
Тым часам кіраўнік расійскай выведкі Нарышкін кажа, што ў Расіі не было і няма планаў уварвання ва Украіну, а ўсе абвінавачанні ў падрыхтоўцы агрэсіі — "добра зрэжысаваная правакацыя".
Канвой волі або калона эгаізму?
Што б ні адбывалася ў свеце, пратэсты супраць каранавіруса ніхто не адмяняў. Спярша пратэставалі дальнабойшчыкі Канады — яны выступілі супраць патрабаванняў, якія абавязвалі іх або прышчапіцца, або сядзець на каранціне пасля паездкі ў ЗША. Пазней да патрабавання адмяніць гэтыя мандаты на вакцынацыю дадаліся і іншыя незадаволенасці кавід-абмежаваннямі, ад якіх людзі стаміліся.
Ініцыятыву канадцаў падхапілі дальнабойшчыкі Францыі і Бельгіі. Пратэстоўцы называюць сябе "канвой волі". Яны планавалі рушыць у бок Парыжа і Бруселя з акцыяй пратэсту. Але ўлады з розных прычын забаранілі гэтыя пратэсты.
Найбольш адкрыта выказаўся адзін з французскіх міністраў. Ён адмаўляецца называць пратэстоўцаў "канвоем волі" і лічыць іх "калонай эгаізму".
У Канадзе пратэсты не сціхаюць, але паліцыя пазбягае канфрантацый. А прэм'ер Джасцін Трудо на мінулым тыдні заявіў, што трэба быць вельмі, вельмі асцярожнымі, абдумваючы варыянт прыцягнення вайскоўцаў для задушэння пратэстаў. Гэта не тое пытанне, у якім варта дзейнічаць лёгка. У перакладзе з канадскай: "Мы адзін народ".
Каалы ў небяспецы
Трывожныя навіны: у Аўстраліі знікаюць каалы. Краіна ўнесла гэту жывёлу, якая гадамі была аўстралійскім сімвалам, у спіс відаў, якія знікаюць на большай частцы тэрыторыі ўсходняга ўзбярэжжа.
Лясныя пажары, засухі і хваробы, урбанізацыя паўплывалі на папуляцыю каал. Урад пастараецца не дапусціць катастрофы — пра каал паклапоцяцца.
Парламенцкае расследаванне, праведзенае ў 2020 годзе, паказала, што каалы вымруць да 2050 года, калі не будуць прыняты тэрміновыя меры для аднаўлення іх колькасці, піша ТАСС. Але ўрад абяцае: меры будуць прынятыя.
Калі гаспадар з табой
Гэтым відэа мы завяршаем пятнічны агляд навін.
На Reddit набірае папулярнасць ролік з прагулкай коргі. Нічога асаблівага, проста чароўныя шчанюкі на выгуле ў заснежаным лесе. І яны кожны раз абарочваюцца, каб праверыць, ці не адстаў гаспадар.
Ніякай сэнсавай нагрузкі — проста пятнічная доза замілавання, якую мы/вы заслужылі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.