Грамадзянін Польшчы прапаноўваў РФ дапамогу ў арганізацыі замаху на Зяленскага
![Зламысніка затрымалі ў Польшчы (ілюстрацыйнае фота)](/sites/default/files/styles/gallery_main/public/2024-04/pap_20131204_0l5.jpg.webp?itok=AqBaGQ5v)
Зламысніка затрымалі ў Польшчы (ілюстрацыйнае фота) / pap.pl
Грамадзянін Польшчы прапаноўваў Расіі дапамогу ў арганізацыі замаху на ўкраінскага прэзідэта Уладзіміра Зяленскага. Мужчыну затрымалі. Яго падазраюць у супрацоўніцтве з расійскімі спецслужбамі, паведамляе Офіс генпракурора Украіны. Падкрэсліваецца, што затрыманне стала магчымым дзякуючы супрацоўніцтву Офіса Генпракурора, СБУ з польскімі парнёрамі. Апошнія атрымалі інфармацыю пра агента ад украінскага боку. Падчас расследавання былі атрыманыя важныя доказы.
Па даных следства, паляк "з уласнай ініцыятывы наладзіў кантакт з прадстаўнікамі камандавання Узброеных сіл РФ, і паведаміў ім пра гатоўнасць працаваць на карысць вайсковай разведкі РФ". Ён збіраў і перадаваў расіянам інфармацыю аб бяспецы аэрапорта Жешув-Ясенка на тэрыторыі Польшчы. Адзначаецца, што "гэта павінна было, сярод іншага, дапамагчы расійскім спецслужбам спланаваць магчымы замах на жыццё прэзідэнта Украіны Уладзіміра Зяленскага падчас ягонага знаходжання ў гэтай краіне".
Польская пракуратура выставіла затрыманаму абвінавачванне ў гатоўнасці дзейнічаць на карысць замежнай спецслужбы, ён пад часовым арыштам. Мужчыне пагражае да 8 гадоў пазбаўлення волі. Расследаванне праводзіць Агенцтва ўнутранай бяспекі пад наглядам Нацыянальнай пракуратуры. Апошняя паведамляе, што 17 красавіка на тэрыторыі Польшчы быў затрыманы Павел К.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.