Горад Майстроў у фестывальным Віцебску (Фотарэпартаж)

Гліняныя “Пагоні” і бел-чырвона-белыя значкі, саламяныя зубры і фота на памяць за тысячу рублёў – у цэнтры Віцебска ў міліцэйскім ачапленні праходзіць святочны кірмаш. Сказаць, што кірмаш гудзе, здаецца, будзе перабольшваннем. Шмат хто з гандляроў скардзіцца на тое, што попыт знізіўся. Людзям на сувеніры не хапае грошай, таму прадаўцы папануюць альтэрнатыўны ход: за 500-1000 рублёў можна сфатаграфавацца з саламянымі ласямі ды зубрамі, з ручнікамі ды аплеценымі бутэлькамі, на вазку, ля дэкаратыўнага стога...

Цэнтр сацыяльнай дапамогі Першамайскага раёна Віцебска вырашыў збіраць сродкі на абсталяванне гурткоў для інвалідаў. Намалявалі шчыт з дзіркамі для твараў, і тыя, хто фатаграфуецца у выглядзе “беларусачкі і беларуса”, адначасова дапамагаюць інвалідам, што жадаюць таксама стаць майстрамі.


У Горадзе Майстроў каго і чаго толькі не пабачыш! “Мадэрнізаваныя” начоўкі з кранам ды антэнай, інсталяцыю “Смерць фашысцкім акупантам”, ляльку-абярэг, якой чамусьці, як стрыптызёрцы, пхаюць купюры “ў дэкальтэ”, і валяныя карэлі ды завушніцы, і майткі з надпісамі, якія ўспрымаюцца як дэвіз “Славянскага базару” – “Мы пелі так, што выцвярэзнік плакаў!”.

Дарэчы, выцвярэзнікі сёлета ў Віцебску амаль не плачуць – Дня цвярозасці вырашана не праводзіць, да шаснаццаці гадзін спіртное прадаюць нават у “мёртвай” 500-метровай зоне вакол канцэртных пляцовак. Так што хто жадае, той нап’ецца. Нават калі носіць на адзенні афіцыйную дзяржаўную сімволіку.

Што тычыцца так званых забароненых сімвалаў, то ім таксама знайшлося месца на кірмашы. Менавіта там, за міліцэйскімі кардонамі, можна спакойна набыць значкі з выявай бел-чырвона-белага сцяга ды Пагоні. Аўтар вырабаў толькі пасміхаецца – маўляў, калі Віцебск цяпер Пагоню на гербе мае, дык хіба скажа хто за яе слова ўпоперак?