Галоўны трэнер зборнай Беларусі па хакеі Дэйв Льюіс пайшоў у адстаўку
![Галоўны трэнер зборнай Беларусі па хакеі Дэйв Льюіс пайшоў у адстаўку](/sites/default/files/styles/gallery_main/public/2023-08/000028_353071_big_0.jpg.webp?itok=Q0y9ZOSo)
Галоўны трэнер зборнай Беларусі па хакеі Дэйв Льюіс пайшоў у адстаўку. Як паведамляе прэс-служба Федэрацыі хакею Беларусі, гэта было яе і Льюіса "сумеснае рашэнне", прынятае пасля "няўдалага старту на чэмпіянаце свету, а таксама з улікам сітуацыі, у якой апынулася зборная". Канадскі спецыяліст лічыць, што "змены ў трэнерскім штабе могуць надаць камандзе неабходны імпульс для паляпшэння гульні, таму пакідае стан зборнай".
Дэйв Льюіс працаваў з беларускай дружынай з канца 2014 года. Абавязкі галоўнага трэнера зборнай Беларусі да заканчэння сусветнага першынства ўскладзены на Сяргея Пушкова, які ўваходзіў у трэнерскі штаб. Яму 54 гады. Пушкоў — галоўны трэнер гродзенскага "Нёмана", чэмпіёна краіны. У мінулым ён — расійскі хакеіст. На трэнерскай працы з 2006-га. У 2009 годзе Сяргей Пушкоў быў галоўным трэнерам юнацкай зборнай Беларусі (падчас чэмпіянату свету).
Змена галоўнага трэнера здарылася пасля трэцяга разгромнага паражэння нашай каманды на чэмпіянаце свету і за крок да развітання з элітай. Бліжэйшы матч пройдзе 9 траўня са зборнай Швейцарыі.
![Галоўны трэнер зборнай Беларусі па хакеі Дэйв Льюіс пайшоў у адстаўку](/sites/default/files/paragraphs/image/0000281523692401298751big.jpg)