Дзенісенка: Украіну абстрэльваюць з тэрыторыі брэсцкага аэрапорта

Расійскія войскі абстрэльваюць ўкраінскія гарады з аэрапорта ў Брэсце. Пра гэта ў тэлеэфіры заявіў дарадца кіраўніка МУС Украіны Вадзім Дзенісенка.

Верагоднасць удзелу беларускага войска ў вайне супраць Украіны Дзенісенка назваў нізкай. Але падкрэсліў, што агрэсія з тэрыторыі Беларусі ўжо адбываецца.

"Наступ з Беларусі ўжо фактычна ідзе, толькі не беларускай арміі. Больш за тое, расіяне пачалі выкарыстоўваць Брэсцкі аэрапорт, з якога пачынаюцца абстрэлы нашых тэрыторый", — цытуе УНІАН яго словы.

Раней з'яўляліся звесткі пра абстрэл Украіны з тэрыторыі Гомельскай і Мінскай абласцей. Акрамя таго, аэрадромы Беларусі выкарыстоўвае расійская ваенная авіяцыя, каб наносіць удары па Украіне. Пры гэтым Аляксандр Лукашэнка заяўляе, быццам Беларусь не ўдзельнічае ў вайне.

Еўрасаюз прызнаў афіцыйны Мінск саўдзельнікам агрэсіі Расіі супраць Украіны.