"Дыялог" ва ўніверсітэтах: на якіх умовах адновяць адлічаных?

26 кастрычніка стала "чорным панядзелкам" для беларускіх студэнтаў. Пасля ўдзелу ў акцыях пратэсту навучэнцам некаторых ВНУ давялося развітацца са сваімі альма-матар. Былі выключаны актыўныя студэнты БНТУ, БДМУ, БДУКМ, МДЛУ, БДУІР і БрДТУ.

Як праходзіць дыялог студэнтаў з кіраўніцтвам ВНУ? На якіх умовах рэктараты гатовыя аднавіць адлічаных? Пра тое, што цяпер адбываецца ў неспакойных універсітэтах, Еўрарадыё на ўмовах ананімнасці вырашыла даведацца ў саміх студэнтаў.

БДМУ: "Скончыце пратэставаць — адновім"

У БДМУ пад раздачу трапілі 20 студэнтаў. У асноўным — удзельнікі сумеснага Маршу пенсіянераў і студэнтаў 26 кастрычніка і тыя, хто на наступны дзень правёў сядзячую акцыю салідарнасці ў падтрымку ўжо адлічаных аднагрупнікаў.

216 выкладчыкаў падпісалі петыцыю аб аднаўленні студэнтаў. Хваля абурэння прывяла да таго, што рэктар Сяргей Рубніковіч пагадзіўся на дыялог. Ініцыятыўная група з шасці студэнтаў сустрэлася з рэктарам. На сустрэчы забаранілі праводзіць аўдыя- і відэаздымку. Таксама туды не пусцілі юрыста, на прысутнасці якога настойвалі студэнты.

Пра што ж там ішла гаворка?

— Рэктар сказаў, што студэнты могуць быць адноўлены толькі на ўмове, калі ў сценах універсітэта не будзе праводзіцца акцый. Вядома, што дваіх аднавілі, але, шчыра кажучы, пакуль нічога не зразумела.

Рэктар назваў падставу для адлічэння: студэнты нібыта прапускалі заняткі. Але ў нас ёсць сістэма электроннага журнала. Да яго нават прыходзіў адзін з выкладчыкаў і сказаў: "Гэта няпраўда, што вы паставілі прагул гэтаму студэнту, таму што ён на маіх парах быў". Гэта значыць, нават тут спрабуюць сфальсіфікаваць, скажам так, — расказвае студэнтка БДМУ Наталля. 

Еўрарадыё: Вы гатовыя адмовіцца ад пратэстаў на такіх умовах?

— Многія, вядома, з гэтым не згодныя. Нават стварэнне гэтай ініцыятыўнай групы большасць прыняла ў штыкі, таму што з боку студэнтаў гэта было саступкай. Не думаю, што перастанем пратэставаць... Пасля таго, што яны зрабілі, — вельмі сумняваюся.

Рэктар БДУКМ... знікла

Па падліках студэнтаў універсітэта культуры, цяпер у спісе адлічаных знаходзіцца 17 чалавек. Афіцыйнай інфармацыі няма дагэтуль.

Еўрарадыё: Вось медыкам рэктар паабяцаў, што адлічаных адновяць, калі яны спыняць пратэсты. У вас была такая дамоўленасць?

— Афіцыйна такой дамоўленасці няма, але да нас амаль кожны дзень прыходзіць хтосьці з дэканата і просіць нікуды не хадзіць і нічога не гаварыць. У цэлым мы не можам пагаварыць цяпер з рэктарам: пасля падпісанага чароўным чынам загада аб адлічэнні хлопцаў і дзяўчат увесь рэктарат знік — на бальнічны! Нам кажуць, што рэктар — кантакт першага ўзроўню. І прыкол у тым, што яна неяк паспела падпісаць загад аб адлічэнні хлопцаў і дзяўчат, знаходзячыся на каранціне. Пры гэтым загад гэты ніхто не бачыў. І азнаёміцца з ім не даюць, — расказвае студэнтка БДУКМ Паліна.

Еўрарадыё: Адлічаныя спрабуюць неяк аднавіцца?

— Яны з адвакатамі з "Сумленных людзей" будуць абскарджваць. Калі наша рэктар яшчэ не пайшла на бальнічны, у размове з адным з хлопцаў яна сказала, што можна паспрабаваць вярнуцца летам.

У МДЛУ "ледзь што — выклікаюць Дэпартамент аховы"

Па звестках студэнтаў МДЛУ, іх шэрагі парадзелі на 15 чалавек. Студэнтка Марыя расказвае, што ад рэктарата не паступала не толькі ніякай прапановы "здзелкі", але і наогул спробы пагаварыць:

— Нічога такога не было. Нас у прынцыпе не чуюць. Спачатку нас проста цярпелі, а цяпер нават і гэтага няма. Ледзь што — выклікаюць Дэпартамент аховы, яны ўжо самых актыўных у твары ведаюць.

Дзеля справядлівасці, новая рэктар МДЛУ Наталля Лапцева праз некалькі дзён пасля прызначэння, сустрэўшыся са студэнтамі, якія бунтуюць, на лесвіцы, сказала, што была б рада дыялогу ў нейкім іншым фармаце.

Еўрарадыё: Адлічаныя студэнты спрабуюць неяк аднавіцца?

— Аднавіцца цяпер дакладна не атрымаецца, гэта нерэальна. Хлопцы і дзяўчаты кажуць, што вось папярэдні рэктар Баранава праз нейкі час, калі ўсё ўляжацца, штосьці, магчыма, і зрабіла б такое — аднавіла б. Але цяпер адлічваюць без разбору: і пяты курс, і магістрантаў.

БрДТУ: дыялог будзе, чакайце  

У Брэсцкім дзяржаўным тэхнічным універсітэце адлічылі некалькіх студэнтаў, якія ўдзельнічалі ў акцыі 26 кастрычніка.

Па словах студэнта Дзмітрыя, рэктар спрабаваў правесці дыялог са студэнтамі, якія пратэстуюць, яшчэ да нацыянальнай забастоўкі, але не паспеў:

— У нас спрабаваў арганізаваць дыялог рэктар, але яго памянялі. На апошняй гутарцы актывістаў з адміністрацыяй прарэктар па выхаваўчай рабоце (гідкая цётка) узяла нумар у аднаго са студэнтаў для зносін са студэнтамі праз яго. Пасля гэтага дзевяць студэнтаў адлічылі. Сказалі, дыялог будзе з новым рэктарам і прадстаўнікамі розных аб'яднанняў. Гэта значыць, як я разумею, новы рэктар, адміністрацыя, БРСМ, прафкам (прафкам у нас, дарэчы, добры, толькі баіцца адкрыта быць супраць), пара актывістаў і нехта яшчэ. Але па факце, я думаю, ніякага дыялогу не будзе.

У БНТУ прарэктар прапанаваў ісці ў суд  

У БНТУ да адлічэння дапратэставаліся... 52 чалавекі з 10 факультэтаў. У сераду, 28 кастрычніка, па пытанні адлічэнняў прайшла сустрэча рэктара са студэнтамі.

— Ніякіх умоў не выстаўлялі, а толькі сказалі пра камісію, якая будзе разглядаць кожны выпадак паасобку. Як гэта будзе працаваць, я не ўяўляю, — расказвае студэнт Аляксандр. — Ведаю, што цяпер хлопцы і дзяўчаты збіраюць характарыстыкі ад выкладчыкаў, ад арганізацый, каб аднавіцца. Гэтым займаюцца прафкамы і студсаветы. Няма такога, што паднявольны орган дапамагае. Прафкам і студсавет рэальна топяць за студэнтаў.

А яшчэ прарэктар сказаў, што можна адлічэнні праз суды аспрэчыць, але я таксама не ўяўляю, як гэта можна зрабіць, які механізм. Хутчэй за ўсё, проста ваду паліў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.