Чыгуначнік затрымаў двух трансфарматарных злодзеяў
![Чыгуначнік затрымаў двух трансфарматарных злодзеяў](/sites/default/files/styles/gallery_main/public/2023-08/zlodziei-0308.jpg.webp?itok=Q8aFL3fD)
Віцебскі чыгуначнік затрымаў двух мужчын, якія кралі трансфарматары, інфармуе БЕЛТА са спасылкай на УУС Віцебскага аблвыканкама.
На перагоне Віцебск-Мядзведка (каля пасёлка Тарны) невядомыя зламыснікі скралі чатыры трансфарматары. Следча-аператыўная група аддзела ўнутраных спраў на транспарце высветліла, што трансфарматары былі скрадзеныя з рэлейнай шафы. У самой шафе стаяла абсталяванне, якое адказвае за працу чыгуначных святлафораў. Парушэнне працы абсталявання магло выклікаць цяжкія наступствы.
Злачынцаў не спыніла нават тое, што трансфарматары былі пад напругай у 220 В.
Міліцыя не змагла знайсці зламыснікаў па гарачых слядах.
Уначы 29 ліпеня ў раёне станцыі Мядзведка невядомыя ўзламалі яшчэ адну рэлейную шафу. Міліцыянты выехалі на месца здарэння. Але яшчэ да іх прыбыцця электраманцёр Міхаіл Міхайлаў каля чыгуначнага пераезду сам затрымаў двух 18-гадовых хлопцаў, адзін з якіх нёс важкі заплечнік.
Высветлілася, што ўначы хлопцы скралі 10 трансфарматараў з дзвюх рэлейных шафаў. Яны ж мелі дачыненне да крадзяжу чатырох трансфарматараў раней.
Аднак кошту скрадзенай маёмасці было недастаткова для крымінальнай справы. Таму на маладых людзей склалі адміністрацыйны пратакол за дробны крадзеж.