Чэхія прызнала ўлады Расіі тэрарыстычным рэжымам
На мітынгу ў Чэхіі / unsplash.com
12 з 14 парламенцкіх дэпутатаў, што засядаюць у Камітэце па замежных справах, прагаласавалі за прызнанне расійскага рэжыму тэрарыстычным, перадаюць České Noviny.
"Камітэт па замежных справах... вызначае тэрарыстычным дзейны расійскі рэжым, згодна з рэзалюцыяй Парламенцкай асамблеі Савета Еўропы", — сказана ў дакуменце.
Парламентарыі асудзілі абстрэлы мірных жыхароў, грамадзянскай інфраструктуры і пагрозы ядзернай зброяй. У сваёй рэзалюцыі яны адзначылі, што Расія адмаўляе Украіне ў праве быць сабой і самастойна вырашаць свой лёс, а расійскія войскі здзейснілі ва Украіне мноства ваенных злачынстваў і злачынстваў супраць чалавечнасці.
Таксама дэпутаты не прызналі вынікі "рэферэндумаў", арганізаваных Крамлём на часова акупаваных тэрыторыях Данецкай, Луганскай, Запарожскай і Херсонскай абласцей.
Раней Літва, Латвія, Эстонія прызналі Расію "дзяржавай-тэрарыстам", а Польшча і ПАРЕ — "тэрарыстычным рэжымам".
