Чавусаў: Беларусь пакіне магчымасць пасварыцца з ЕС

Палітолагі лічаць вяртанне санкцый вельмі малаверагодным. Але паразважалі, якія наступствы ва ўнутранай і знешняй палітыцы можна чакаць ад беларускага ўраду, калі такое рашэнне ўсё ж будзе прынятае.

16 – 17 лістапада 2009 г. у Бруселі адбудзецца паседжанне Савета ЕС, на якім будзе прынятае рашэнне, ці застануцца на наступныя паўгода ўязнымі ў ЕС шэраг беларускіх чыноўнікаў, у тым ліку і Аляксандр Лукашэнка. Візавыя санкцыі на ўезд у краіны ЕС былі замарожаныя год таму, у кастрычніку 2008 года.

Алесь Лагвінец лічыць, што калі візавыя санкцыі вернуцца, то Беларусь будзе больш сябраваць з Расіяй і аўтарытарнымі краінамі па ўсім свеце.

Алесь Лагвінец: “Мы праходзілі праз такі этап напружанасцяў у адносінах. І тут набор магчымасцяў беларускіх уладаў вядомы: гэта, і антызаходняя істэрыка, і варожыя крокі, і ўшчыльненне адносінаў з Расіяй, ці яшчэ далей на ўсход, альбо па ўсім свеце з аўтарытарнымі недэмакратычнымі рэжымамі кшталту Ірана альбо Венесуэлы”.

На думку Віталя Сіліцкага, у выпадку вяртання санкцый беларускі ўрад адкаціць назад кволыя дасягненні лібералізацыі: “Вернуць [беларускія ўлады - заўвага Еўрарадыё] усё, што яны лібералізавалі на год, прычым вельмі дэманстрацыйна”.

Андрэй Казакевіч мяркуе, што калі чыноўнікаў зноў зробяць неўязнымі, то Лукашэнка ўспрыме гэта як падман і парушэнне правілаў гульні, якая пачалася больш за год таму.

Андрэй Казакевіч: “Тады нейкія захады будуць, каб прадэманстраваць, што Беларусь мае нейкую альтэрнатыву, якія могуць нанесці шкоду інтарэсам ЕС у рэгіёне. Думаю, што такія варыянты разглядаюцца як магчымыя”.

Эксперт таксама не выключыў, што Беларусь у такім выпадку зможа нават прызнаць незалежнасць Абхазіі і Паўднёвай Асеціі.

Не выключае такога развіцця падзеяў у выпадку пакідання візавых абмежаванняў і Юры Чавусаў:

"Я думаю, як сімвалічны жэст гэта магчыма. Прызнанне Абхазіі і Паўднёвай Асеціі будзе сімвалічным знакам здачы беларускага суверэнітэту".

Юры Чавусаў мяркуе, што калі беларускіх чыноўнікаў зноўку зробяць неўязнымі, то беларускаму ўраду давядзецца пераглядаць адносіны з Расіяй.

Юры Чавусаў: “Калі не будзе падтрымкі з боку Еўропы, то трэба будзе дамаўляцца з Расіяй аб умовах далейшай падтрымкі беларускага рэжыму. Калі я кажу пра выбудову новых адносінаў, я маю на ўвазе, у першую чаргу, доступ да беларускіх прадпрыемстваў з боку расійскага імперыялістычнага капіталу”.

У любым выпадку, на думку Юрыя Чавусава, магчымасць пасварыцца з ЕС будзе заўсёды аставацца. І яе маюць на ўвазе стратэгі Адміністрацыі прэзідэнта, асабліва пры набліжэнні прэзідэнцкіх выбараў у пачатку 2011 года.


Іншыя матэрыялы на тэму візавых санкцый, а таксама асвятленне паседжання Савета ЕС 16-17 лістапада з Бруселя — на старонцы Еўрарадыё "Клікні Еўропу".


Фота: naviny.by

Апошнія навіны

Галоўнае

Выбар рэдакцыі