"Чалавек, мацнейшы за сталь" — Newsweek назваў Пачобута "Постаццю дзесяцігоддзя"
![Анджэй Пачобут / БЕЛТА](/sites/default/files/styles/gallery_main/public/2023-08/APa.jpg.webp?itok=crQXXt05)
Анджэй Пачобут / БЕЛТА
Польская рэдакцыя амерыканскага выдання Newsweek узнагародзіла беларускага палітвязня і журналіста Анджэя Пачобута прэміяй імя Тэрэзы Таранскай у катэгорыі "Постаць дзесяцігоддзя".
"Выдатны журналіст, калега, чалавек, мацнейшы за сталь", — сказаў пра яго журналіст Яцэк Паўліцкі. Ён адзначыў, што Пачобут не змог атрымаць узнагароду, паколькі знаходзіўся ў турме. Але "ён выжыве. Вось убачыце! Ён яшчэ напіша тэкст пра падзенне Лукашэнкі", — адзначыў Паўліцкі. Яго словы прыводзіць "Радыё Свабода".
Анджэй Пачобут — вядомы журналіст і грамадскі дзеяч, сябра незарэгістраванага Саюза палякаў Беларусі. Яго затрымалі вясной 2021 года і абвінавацілі паводле двух артыкулаў КК: у "закліках да дзеянняў, накіраваных на прычыненне шкоды нацыянальнай бяспецы Рэспублікі Беларусь" і "распальванні варожасці або варажнечы". У лютым 2023 года журналіста асудзілі на 8 гадоў пазбаўлення волі ў калоніі ўзмоцненага рэжыму. Са жніўня Пачобута на 6 месяцаў адправілі ў ПКТ. А ў пачатку лютага стала вядома, што яго накіравалі ў ШІЗА. На той момант ён ужо 8 месяцаў не атрымліваў перадач.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.