"Цэйс-БелОМА" пераарыентуюць на выраб прыцэлаў для Расіі — BELPOL

Нямецка-беларускае прадпрыемства "Цэйс-БелОМА" ператвараюць з вытворцы медыцынскіх прыбораў у вытворцу прыцэлаў для стралковай зброі і бронятэхнікі для расійскага войска. Займаецца гэтым рэжым Лукашэнкі і, у прыватнасці, завод імя Вавілава, сцвярджае ініцыятыва BELPOL. 

ММЗ імя Вавілава — гэта кіруючая кампанія холдынгу "БелОМА". У СП "Цэйс-БелОМА" завод з'яўляецца сузаснавальнікам і мае 40% статутнага капіталу. Асноўным заснавальнікам, які трымае 60% акцый, з'яўляецца нямецкая кампанія Carl Zeiss Jena GmbH.

5 снежня 2023 года завод імя Вавілава трапіў пад санкцыі ЗША — за дапамогу Расіі ў вайне супраць Украіны. Прадпрыемства вырабляе прыцэлы для бронятэхнікі і стралковай зброі.

Пасля гэтага Zeiss Jena GmbH прапанавала ліквідаваць "Цэйс-БелОМА". Але беларускі бок адмовіўся, вымушаючы нямецкую кампанію выйсці з долі.

У BELPOL сцвярджаюць, што завод імя Вавілава мае на мэце ліквідаваць СП з мінімальнымі рызыкамі і фінансавымі стратамі для сябе. Усю вытворасць і спецыялістаў плануецца перавесці ў ММЗ, каб яны працавалі на ваенныя заказы для Расіі.

Паводле інфармацыі BELPOL, у 2024 годзе "Холдынг БелОМА — Пеленг" плануе вырабіць амаль 1800 прыцэлаў або элементаў прыцэла САСНА-У для расійскіх танкаў. Колькасць цеплавізараў, лазерных далёкамераў і цэлеўказальнікаў, вырабленых холдынгам БелОМА, сёлета перавысіць 10 000 штук.

Ужо сёлета ў красавіку ММЗ размясціла ў "Цэйс-БелОМА" заказы на вытворчасць прыцэлаў, кажуць у BELPOL.