Браслаў затапіла магутная залева
Магутная залева затапіла шэраг вуліц у Браславе, перадае БЕЛТА. Ліквідацыяй падтапленняў займаюцца камунальныя службы горада з выкарыстанне тэхнікі райаддзела па надзвычайных сітуацыях, заявіў начальнік аддзела ЖКГ Браслаўскага райвыканкама Віктар Скрабоўскі.
Дрэнажная сістэма горада не справілася з залевай. На затапленне горада паўплывалі таксама перапады вышынь мясцовасці, блізкасць двух азёраў і гліністыя глебы. Вада падтапіла прыбіральні, адрыны, участкі гародаў на вуліцах, размешчаных у нізіннай мясцовасці і каля возера Навята.
На праезнай частцы ўзровень вады дасягаў бардзюраў. Найбольш пацярпелі ад стыхіі жыхары дамоў па вуліцах Гагарына, Юбілейнай, Ленінскай.
Дарэчы, ў Шаркаўшчыне за дзевяць гадзін выпала траціна месячнай нормы ападкаў — 23 мм.
Гэтыя дажджы ў Беларусь прынёс з паўднёвага захаду Еўропы цыклон "Томас". На 18 і 19 верасня сіноптыкі абвясцілі ў нашай краіне аранжавы ўзровень небяспекі.
