Вы тут

Bloomberg: РФ у пары гадзін ад дэфолту, хоць можа і хоча заплаціць па пазыках

Расія кажа, што пра дэфолт гаворка не ідзе, таму што ў яе досыць сродкаў для таго, каб разлічыцца па абавязках / pixabay

У нядзеля ўвечар сканчаецца тэрмін, падчас якога Расія магла перавесці выплаты па аблігацыях на суму прыкладна ў 100 мільёнаў долараў, піша Bloomberg. Гэтыя выплаты заблакаваны санкцыямі, так што хоць Крэмль і хацеў бы, і мог бы заплаціць, ён не можа гэтага зрабіць.

Аўтарытэтнае фінансавае выданне піша, што калі фундатары не атрымаюць сваіх грошай да ўсталяванага тэрміну, у панядзелак раніцай адбудзецца дэфолт.

Расія так не думае

Пры гэтым Расія не лічыць, што яна ў кроку ад дэфолту. Тлумачым, як усё пачыналася. Калі ЗША прыпынілі ліцэнзію, якая дазваляла прымаць платы ад Расіі па дзярждоўгу, краіна страціла магчымасць плаціць па еўрааблігацыях у доларах. Тады расійскія ўлады заявілі, што будуць праводзіць разлікі ў рублях, піша ВВС.

Грошы для фундатараў з заходніх краін будуць пералічаныя на адмысловыя валютныя рахункі, адкуль яны, на думку расійскіх улад, змогуць іх забраць. Датуль, пакуль яны не забяруць сродкі, яны будуць індэксавацца паводле змены курса. Але рэйтынгавыя агенцтвы папярэджвалі, што зафіксуюць дэфолт, калі Расія пяройдзе на разлік па еўрабондах у рублях.

"Ёсць усе падставы меркаваць, што штучнае пазбаўленне Расійскай Федэрацыі магчымасці абслугоўваць свой вонкавы суверэнны абавязак мае на мэце навесіць цэтлік "дэфолт". Кожны можа заявіць што хочаш і можа паспрабаваць навесіць такі цэтлік. Але кожны, хто разбіраецца ў сітуацыі, ведае, што гэта ніякім чынам не дэфолт", — кажа міністр фінансаў РФ Антон Сілуанаў.

“Сімвалічная падзея” і “упершыню з часоў Кастрычніка”

“На дадзены момант гэта ў значнай ступені сімвалічная падзея, улічваючы, што Расія ўжо з'яўляецца эканамічным, фінансавым і палітычным ізгоем у большасці краін свету. Але гэта дэманструе, як ЗША, Еўропа і іншыя краіны закручвалі гайкі з моманту пачатку ўварвання ў лютым”, — піша Bloomberg.

Паводле слоў выдання, для Расіі гэта будзе першы дэфолт такога роду з 1918 года — з той пары, як бальшавікі адмовіліся ад абавязкаў Расійскай імперыі.

“Зараз пытанне ў тым, што адбудзецца далей, бо рынкі стукнуліся з унікальным сцэнарам неплацежаздольнага пазычальніка, у якога есці жаданне і рэсурсы заплаціць, але ён не можа”, — піша выданне.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.