Бензема — уладальнік "Залатога мяча"
Карым Бензема / reuters.com
Форвард мадрыдскага "Рэала" і зборнай Францыі Карым Бензема — уладальнік "Залатога мяча". Урачыстая цырымонія ўручэння ўзнагароды France Football найлепшаму футбалісту года прайшла ў Парыжы.
34-гадовы Бензема правёў выдатны сезон, у якім разам з "Рэалам" выйграў Лігу чэмпіёнаў і чэмпіянат Іспаніі, стаў найлепшым бамбардзірам гэтых турніраў (15 і 27 галоў адпаведна).
"Мая дзіцячая мара ўвасобілася ў жыццё, — кажа футбаліст. — Гэта складана, але не немагчыма. Я аддаю перавагу гуляць у камандзе, а не забіваць. Гэты трафей — ўзнагарода за намаганні".
"Залаты мяч" уручаецца з 1956 года. Для Бензема гэта першая такая ўзнагарода. Сем разоў (апошні — у 2021 годзе) яе атрымліваў Ліянэль Месі, пяць разоў — Крышціяну Раналду. Сёлета сярод галоўных прэтэндэнтаў іх не было.
